មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើល និង ចែករំលែកបន្តព្រោងព្រាតទុកជាការក្រើនរំឭកឱ្យប្រុងប្រយ័ត្ន បន្ទាប់ពីមន្ទីរព្យាបាលមួយកន្លែងបានបង្ហាញពីករណីក្មេងប្រុសអាយុ ៣ ឆ្នាំ បានញាត់ដែកចូលទៅក្នុងរន្ធច្រមុះ មានសភាពកោងពិបាកយកណាស់។
តាមរយៈផេក មន្ទីរពហុព្យាបាល និង សម្ភព ហ្គោលដិន មានទីតាំងនៅក្នុងខេត្តបាត់ដំបង បានបង្ហោះរូបភាពភ្ជាប់ជាមួយសារនៅថ្ងៃទី ១៦ ខែកុម្ភៈ ឆ្នាំ ២០២៥ ឱ្យដឹងថា ៖ «ក្មេងប្រុសអាយុ ៣ ឆ្នាំ ញាត់ដែកចូលក្នុងរន្ធច្រមុះ ពេលមកដល់មន្ទីរពេទ្យឆ្លុះអង់ដូស្កុប មើលមិនឃើញ។ គ្រូពេទ្យបានធ្វើការថតបន្ថែមទើបឃើញថាដែកនៅជ្រៅណាស់ ដែកមានសភាពកោង មិនងាយយកទេ។ ករណីខ្លះអាចរអិលធ្លាក់ចូលទៅក្នុងបំពង់ខ្យល់ទៀតផង។ គ្រោះថ្នាក់ណាស់»។
ទន្ទឹមនឹងករណីនេះ គ្រូពេទ្យក៏បានក្រើនរំឭកដល់ប៉ាម៉ាក់ ឬ អាណាព្យាបាល ដែលមានកូនតូចៗ គប្បីគួរប្រយត្ន័ឱ្យមែនទែន ដែលកុមារវ័យប៉ុណ្ណេះ ងាយនឹងយកវត្ថុផ្សេងៗដាក់ក្នុងច្រមុះ និង ត្រចៀកជាដើម៕
