ជា CEO វ័យក្មេង លោក អ៊ុយ ចេងហេង ត្រូវបានគេស្គាល់ជាស្ថាបនិក ក្រុមហ៊ុន ណាវីតា ដែលជាក្រុមហ៊ុនធ្វើការកែច្នៃផ្លែឈើធម្មជាតិ ទៅជាពីរប្រភេទ គឺ តំណាប់ផ្លែឈើសម្ងួត និង ផ្លែឈើកំប៉ុង។
ចាប់ផ្តើមពីតូចរហូតដល់ធំ ស្ថាបនិក អ៊ុយ ចេងហេង បានបើកដំណើរការក្រុមហ៊ុន ណាវីតា នៅខែ វិច្ឆិកា ឆ្នាំ ២០២០ បើគិតមកទល់ពេលបច្ចុប្បន្ន មានអាយុកាលប្រមាណជិតប្រាំឆ្នាំមកហើយ។
តាមរយៈវីដេអូសម្ភាសជាមួយ សហគ្រិនខ្មែរ កត្តាចម្បង ដែលជំរុញឱ្យលោក បើកអាជីវកម្មនេះ គឺកើតចេញពីការស្រលាញ់ចូលចិត្តតាំងពីតូច ដែលមានបំណងចង់បង្កើតអាជីវកម្មកែច្នៃផ្លែឈើ ឬ បង្កើតផលិតផលក្នុងស្រុក និង ម្យ៉ាងទៀត ដោយសារឃើញឪពុករបស់លោកជាកសិករ ដែលតែងជួបបញ្ហាជាច្រើននៅពេលប្រមូលផលម្តងៗ ជាពិសេស ទីផ្សារកសិកម្មមានតម្លៃទាប ដូច្នេះហើយ ទើបលោកចង់ប្រមូលភោគផលកសិកម្មទាំងអស់នោះ មកធ្វើការកែច្នៃ ដើម្បីបង្កើតនូវតម្លៃមួយទៀត សម្រាប់ទីផ្សារកសិកម្មនៅក្នុងស្រុក។
ជាលទ្ធផល ត្រឹមរយៈពេលដ៏ខ្លី ក្រុមហ៊ុនរបស់លោកបានបោះជំហានចូលក្នុងវិស័យកសិឧស្សាហកម្ម ហើយទទួលបានការគាំទ្រ និង ទទួលស្គាល់ពីស្ថាប័នរដ្ឋ និង ឯកជនយ៉ាងលឿនគួរឱ្យកត់សម្គាល់។ តាមរយៈផលិតផលនេះ ក្រុមហ៊ុនក៏ឈ្នះពានរង្វាន់ជាច្រើន គួរជាទីមោទកផងដែរ។
ផលិតផលដូចជា តំណាប់ស្វាយ តំណាប់ស្រកានាគ តំណាប់មៀនប៉ៃលិន តំណាប់ម្នាស់ និង មានកំប៉ុង…ជាដើម ក្រុមហ៊ុនរបស់លោកបានផ្តោតលើសុខភាពចម្បង ដោយផ្តល់រសជាតិ និង វីតាមីនពីធម្មជាតិរបស់ផ្លែឈើ ផលិតតាមស្តង់ដាត្រឹមត្រូវ។ ទាំងនេះហើយ ដែលធ្វើឱ្យផលិតផលរបស់លោក មិនត្រឹមលក់ដាច់នៅក្នុងស្រុកប៉ុណ្ណោះទេ តែថែមទាំងបាននាំចេញទៅក្រៅប្រទេសផងដែរ។
ចំពោះចក្ខុវិស័យ លោក អ៊ុយ ចេងហេង ចង់ឱ្យក្រុមហ៊ុនរបស់ខ្លួន ក្លាយទៅជាក្រុមហ៊ុនមួយ ដែលស្ថិតនៅក្នុងផ្នត់គំនិតដំបូងរបស់អ្នកប្រើប្រាស់ ក៏ដូចជាដៃគូសហការផ្សេងៗនៅពេលពួកគេគិតដល់សហគ្រាស ដែលផ្តល់នូវអាហារសុវត្ថិភាព ហើយទទួលបានការសហការប្រកបដោយកិត្តិយសទាំងក្នុង និង ក្រៅតំបន់៕
