បោះជំហានដំបូងក្នុងវិស័យបវរកញ្ញា សុគា គីមលាង ប្រកួតម្តងពីរកម្មវិធី ឥលូវមកដឹងប្រវត្តិ និង លក្ខណៈសម្បត្តិរបស់នាង

កាលពីប៉ុន្មានថ្ងៃមុន កម្មវិធី Miss Universe Cambodia 2025 បានបង្ហាញបេក្ខភាពផ្លូវការចំនួន ២០ នាក់។ ក្នុងនោះមហាជនមានការភ្ញាក់ផ្អើលជាខ្លាំង ដោយស្ងាត់ៗ កញ្ញា សុគា គីមលាង ដែលគេស្គាល់ថាជានាដកា និង ជាតារាសម្តែងដ៏ល្បីមួយរូប ក៏បានបង្ហាញមុខជាបេក្ខភាព ខណៈដែលនាងក៏ទើបតែត្រូវបានគេប្រកាស ក្លាយជា Universal Woman Cambodia 2025 នឹងតំណាងឱ្យកម្ពុជាទៅប្រកួតនៅលើឆាកអន្តរជាតិ។ ជាលើកដំបូង ហើយប្រកួតម្តងពីរកម្មវិធី ចុះតើ កញ្ញា សុគា គីមលាង មានប្រវត្តិ និង លក្ខណៈសម្បត្តិអ្វីខ្លះសម្រាប់វិស័យមួយនេះ?

មានកម្ពស់ ១,៦៨ ម៉ែត្រ កញ្ញា សុគា គីមលាង ឬគេស្គាល់ឈ្មោះហៅក្រៅ Kon Ant សព្វថ្ងៃមានអាជីពជានាដកា ជាតារាបង្ហាញម៉ូដ និង ជាតារាសម្តែង។ នាងចាប់កំណើតនៅទីក្រុងភ្នំពេញ ជាកូនស្រីច្បងក្នុងចំណោមបងប្អូន៥នាក់ (ប្រុស ២ ស្រី ៣ ) ស្ថិតក្នុងគ្រួសារជីវភាពមធ្យម ដែលមានឪពុកជាយោធិន និង ម្តាយជាស្ត្រីមេផ្ទះ។ ដោយមានចំណង់ចំណូលចិត្ត និង ទេពកោសល្យទៅលើសិល្បៈរបាំបុរាណ គួបផ្សំឪពុកម្តាយស្រលាញ់របាំព្រះរាជទ្រព្យផងនោះ នាងបានចូលសិក្សាផ្នែករបាំបុរាណនៅសាលាមធ្យមវិចិត្រសិល្បៈតាំងតែពីកុមារ។

នៅកំឡុងឆ្នាំ ២០១៦ – ២០១៧ ខណៈទើប​ចប់ថ្នាក់ឌីប្លូម  នាងបានចាប់ផ្តើមចេញសម្តែងរបាំតាមកម្មវិធីតូចធំជាបន្តបន្ទាប់ ព្រមទាំងមានឱកាសបានចេញសម្តែងដល់ក្រៅប្រទេសដូចជា ចិន ហុងកុង ថៃ វៀតណាម បារំាង និង ប៉ែកអឺរ៉ុបជាដើម។  កាលពីឆ្នាំ ២០១៨ ប្រជាប្រិយភាពរបស់នាងចាប់ផ្តើមផ្ទុះឡើងខ្លាំង តាមរយៈការបង្ហាញខ្លួនជាតួអង្គទេពធីតាឆ្នាំច នៅក្នុងព្រឹត្តិការណ៍អង្គរសង្ក្រាន្ត ដោយមហាជនសរសើរមិនដាច់ពីមាត់នូវរូបសម្រស់ សាច់ឈាមស្រស់ថ្លា ស័ក្តិសមឥតទាស់ជាទេពធីតាឆ្នាំថ្មី។

ដោយរូបសម្រស់អំណោយផលពីធម្មជាតិ នាងចាប់ផ្តើមមានទីផ្សារព្រមគ្នាជាមួយការថតផ្សព្វផ្សាយពាណិជ្ជកម្ម​រាប់តាំងពី សម្អាងការ ម៉ូដសម្លៀកបំពាក់ ផលិតផលសម្រស់ គ្រឿងលម្អ រហូតក្លាយជាអ្នកតំណាងឱ្យម៉ាកផលិតផលនាំចូលពីក្រៅស្រុកទៀតផង។ នៅដើមឆ្នាំ ២០២១ នាងបានសម្តែងរឿង «ភិក្ខុពនេចរ» ដែលនាងសម្តែងជាតួឯក ហើយក៏ជារឿងដំបូងបំផុត ដែលនាងបោះជំហានក្នុងវិស័យភាពយន្ត។

តាមរយៈការចូលប្រកួតក្នុងវិស័យបវរកញ្ញា អ្នកគាំទ្រក៏សង្ឃឹមថា នាងនឹងអាចជោគជ័យមួយជំហានទៀត ខណៈនាងមានទាំងរូបសម្រស់ បទពិសោធ ក៏ដូចជាចំណេះដឹង ដែលអាចប្រជែងនឹងបេក្ខភាពនៅលើឆាកអន្តរជាតិ៕