សារព័ត៌មាន The Strait Times បានរាយការណ៍ពីករណីរបស់នារីជនជាតិចិនម្នាក់ ដែលច្រឡំផាវថាជាស្ករគ្រាប់ ហើយមកទំពាមួយគ្រាប់ បណ្តាលឱ្យផ្ទុះពេញមាត់បែកអំពិលអំពែក។
តាមព័ត៌មានបានឱ្យដឹងថា នៅថ្ងៃកើតហេតុនារីរូបនេះអង្គុយមើលទូរទស្សន៍លេងម្នាក់ឯង ហើយក៏បានទាញថង់នំដែលបងប្រុសទិញមកផ្ញើ តែចៃដន្យទាញខុសថង់ ទៅប៉ះចំថង់ផាវឯណោះវិញ។ នាងទាញផាវមកមើល ក៏ច្រឡំស្មានថាជាស្ករគ្រាប់ទឹកដោះគោ ដែលនាងធ្លាប់ញ៉ាំនៅពីក្មេង ទើបយកមួយគ្រាប់មកទំពា ហើយគ្រាន់តែទំពាភ្លាម ផាវក៏ផ្ទុះពេញមាត់នាងតែម្តង។
យ៉ាងណាមិញ ជាសំណាងល្អនាងមិនបានរងរបួសធ្ងន់នោះទេ គ្រាន់តែបានភ្លក់រសជាតិរំសេវ និង ស្ពឹកមាត់ ព្រមទាំងមានរបួសបន្តិចបន្តួចតែប៉ុណ្ណោះ។ ដោយឡែក មហាជននៅតាមបណ្តាញសង្គម ក្រោយដឹងរឿងរ៉ាវនេះហើយ ម្នាក់ៗក៏អស់សំណើចលាយឡំនឹងការហួសចិត្ត ហើយក៏ចាត់ទុកថាជារឿងគួរឱ្យប្រយ័ត្នម្យ៉ាងដែរ៕
ប្រភព៖ Khaosod
