កាលពីអំឡុងចុងឆ្នាំ ២០២៤ កន្លងទៅ អ្នកតាមដានជីវិតគូរបស់លោក ម៉ាដូណា និង គូស្នេហ៍ប្រុស គឺលោក ហេង មានការភ្ញាក់ផ្អើលយ៉ាងខ្លាំង បន្ទាប់ពីលោក ហេង បានប្រកាសពីការបែកគ្នារបស់អ្នកទាំង ២ នៅលើបណ្តាញសង្គមហ្វេសប៊ុក ក្រោយទាក់ទងគ្នាអស់រយៈពេល ៨ ឆ្នាំ។ ក្នុងនោះដែរ លោក ហេង ក៏បានបញ្ជាក់ថា ការចែកផ្លូវគ្នានេះ គឺមិនមែនមានបញ្ហា ឬអ្នកទី ៣ នោះឡើយ។
យ៉ាងណាមិញ កន្លងទៅថ្មីៗនេះ ពោលគឺក្រោយប្រកាសបែកគ្នាមួយរយៈ មហាជនបានលើកឡើងថា លោក ម៉ាដូណា និង លោក ហេង អតីតគូស្នេហ៍មើលទៅដូចជាមិនទាន់បែកបាក់គ្នាដាច់ស្រេច ឬអាចនឹងត្រូវរ៉ូវគ្នាវិញ ខណៈ អតីតគូស្នេហ៍មួយគូនេះ នៅបន្តដឹងទុក្ខធុរៈគ្នា និង បាននាំគ្នាទៅដើរកម្សាន្តនៅឯប្រទេសថៃជុំគ្នាទៀតនោះ។
ដោយឡែក កាលពីអំឡុងថ្ងៃចូលឆ្នាំប្រពៃណីខ្មែរ អ្នកគាំទ្របានចាប់អារម្មណ៍ជាថ្មី ក្រោយឃើញលោក ម៉ាដូណា បានបង្ហោះរូបនឹងបុរសម្នាក់ និង ប្រើពាក្យផ្អែមល្ហែម ដោយបញ្ជាក់ថា បុរសវ័យក្មេងរូបនោះ ជាគូស្នេហ៍ថ្មីរបស់លោក។ លើសពីនោះ អ្វីកាន់តែភ្ញាក់ផ្អើល ក្រោយបង្ហាញមុខគូស្នេហ៍ថ្មីហើយ លោក ម៉ាដូណា ក៏បានទម្លាយពីមូលហេតុនៃការបែកបាក់លោក ហេង ពិតប្រាកដ។
ក្នុងនោះ លោក ម៉ាដូណា បានបង្ហោះសាររៀបរាប់ថា៖ «ខ្ញុំមិនដែលមានចិត្តបោះបង់អ្នកទេ តែអ្នកទេដែលទៅចោលខ្ញុំ! សំខាន់អ្នកតែងតែគិតពីការងារខ្លួនឯង មិនដែលផ្តល់តម្លៃការងារខ្ញុំទេ។ អ្នកអាត្មានិយមចំពោះខ្ញុំណាស់! ខ្ញុំតែងតែគិតពីអ្នករហូត ភ្លេចគិតពីផ្លូវចិត្តខ្ញុំ»៕
