ថ្មីៗនេះ តារាស្រី Due Arisara មានការជាប់ពាក់ព័ន្ធនឹងការយកគ្រឿងពេជ្រ និង កាបូបមានតម្លៃប្រមាណជា ៦២ លានបាតរបស់ស្រ្តីហាយសូរម្នាក់ទៅបញ្ចាំ ដែលស្រ្តីរូបនេះក៏ចេញមុខមកទារ និង ទម្លាយពីនាង រហូតក្លាយទៅជារឿងដ៏ក្តៅគគុកនៅក្នុងបណ្តាញសង្គមប្រទេសថៃ។
កាលពីថ្ងៃទី ១៩ ខែមីនា ឆ្នាំ ២០២៥ កន្លងទៅនេះ ស្រ្តីហាយសូរខាងលើ បានចូលរួមក្នុងកម្មវិធី Hone-Krasae ដោយបានទម្លាយឱ្យដឹងថាកាលពីឆ្នាំ ២០២៤ កន្លងទៅ Due Arisara បានមកសុំខ្ចីរបស់មានតម្លៃពីនាង ដែលមានដូចជាកាបូប នាឡិកា និង ខ្សែក មានតម្លៃសរុបជាង ៦២ លានបាត ដោយអះអាងយកទៅដាក់ធានាជាមួយនឹងម្ចាស់បំណុលម្នាក់ ដែលគេកំពុងគំរាមទារលុយនាង។ Due សន្យានឹងយកឱ្យវិញក្នុងរយៈពេល ១៥ ថ្ងៃ តែដល់ថ្ងៃកំណត់នាងក៏មិនបានយកមកឱ្យ លុះដល់ឆ្នាំ ២០២៥ នេះ ទើបមានគេប្រាប់ថារបស់ទាំងអស់នោះ ត្រូវ Due Arisara យកទៅបញ្ចាំអស់ហើយ។ ស្រ្តីហាយសូររូបនេះបានឱ្យដឹងថា នាងមិនសុំអ្វីទាំងអស់ នាងសុំឱ្យតែយករបស់មកឱ្យនាងវិញ នាងនឹងមិនដំណើរការក្តីតាមផ្លូវច្បាប់ឡើយ។
យ៉ាងណាមិញ ក្នុងនោះតារាស្រី Due Arisara ក៏ខលទូរស័ព្ទនិយាយជាមួយនឹងពិធីករលោក Num Kanchai ក៏ដូចជាស្រ្តីហាយសូរនេះដែរ ដោយនាងបានសារភាពថានាងពិតជាជំពាក់បំណុលគេពិតមែន។ នាងបានឱ្យដឹងថា នាងយកលុយទៅធ្វើជំនួញ ប៉ុន្តែជំនួញដែលនាងធ្វើទាំងប៉ុន្មានមិនបានជោគជ័យឡើយ លើសពីនេះទៀតនាងក៏ព្រមសារភាពថា នាងចាយលុយធំជាងខ្លួន នាងចាយលុយមិនប្រមាណ ទើបមានបញ្ហាបែបនេះ៕
ប្រភព៖ Sanook
