បើគិតមកដល់ពេលនេះ រយៈពេលប្រមាណ ១ ខែ មកហើយ ដែលតារាចម្រៀងរ៉េប KingChi បានប្រកាសពីសុខទុក្ខជំងឺរបស់ភរិយា ដែលត្រូវលាងឈាមជាប្រចាំ និង ត្រូវវះកាត់ប្តូរក្រលៀនផងនោះ។
ក្រោយពីទទួលបានដំណឹងនេះហើយ គេបានឃើញមហាជន អ្នកគាំទ្រ និង មិត្តសិល្បករជាច្រើន បានចូលរួមជាចំណែកមួយជួយសម្រួលដល់ KingChi ក្នុងការព្យាបាលភរិយា តាមរយៈការជូនជាថវិកាដល់លោកផងដែរ។
ដោយឡែក ក្រោយពីបានព្យាបាលជំងឺ ដោយការលាងឈាមបានមួយរយៈ អ្នកនាង ម៉ាណូឡែន ភរិយាតារាចម្រៀងរ៉េប KingChi ក៏តែងបង្ហាញពីស្ថានភាពជំងឺរបស់អ្នកនាងជូនដល់មហាជន និង មិត្តភក្តិលើបណ្តាញសង្គមផងដែរ។ យ៉ាងណាក៏ដោយ អ្នកនាងនៅតែត្រូវបន្តតាមដានសុខភាព និង លាងឈាមជាប្រចាំ ដោយចំណាយថវិកាច្រើនដូចគ្នា។
ដោយឡែក ថ្មីៗនេះ មហាជនកំពុងផ្ទុះការចាប់អារម្មណ៍ និង សរសើរដល់សិល្បករ ៤ រូប រួមនឹងតារាចម្រៀងរ៉េប KingChi ដែរ នឹងត្រៀមរៀបចំការប្រគំតន្ត្រី ដើម្បីប្រមូលថវិកាពីការលក់សំបុត្រទាំងអស់ជូនដល់ភរិយាតារាចម្រៀង KingChi ដើម្បីវះកាត់។
ក្នុងនោះ តាមរយៈការបង្ហោះរបស់តារាចម្រៀងស្រី កញ្ញា Sophia បានរៀបរាប់ថា៖ «ជម្រាបសួរបងប្អូនទាំងអស់គ្នា! នៅថ្ងៃទី ២១ ខែ ៦ ឆ្នាំ ២០២៥ ខាងមុននេះ ពួកយើងនឹងធ្វើកម្មវិធីប្រគំតន្ត្រីមួយ ដើម្បីរៃអង្គាសថវិកាបន្ថែម សម្រាប់ប្រពន្ធរបស់បង KingChi ដើម្បីបញ្ជូនគាត់ទៅមន្ទីរពេទ្យដើម្បីផ្លាស់ប្តូរក្រលៀន។ ចូលរួមដោយតារាកិត្តិយស ៥ នាក់ ជាមួយនឹងតម្លៃសំបុត្រ $១០។ រាល់ថវិកាដែលប្រមូលបាន នឹងបរិច្ចាគជូនដល់គ្រួសាររបស់បង KingChi ទាំងអស់ ១០០%។ អញ្ជើញមកចូលរួមកម្សាន្ត សំណេះសំណាល ច្រៀងលេង រាំក៏បាន ដើម្បីបង្ហាញការស្រលាញ់ និង លើកទឹកចិត្តគ្នាយើង។ សូរអរគុណ! ជួបគ្នានៅថ្ងៃនោះ»៕
