ប្រិយមិត្តមួយចំនួនច្បាស់ជាបានស្គាល់លោកគ្រូចិនសែ ម៉ុង ហើយ ដែលលោកគឺជាគ្រូហុងស៊ុយបែបវិទ្យាសាស្ត្រមួយរូប តែងចែករំលែកពីក្បួនហុងស៊ុយ វិធីសាស្រ្ដសែនព្រេងបែបចិន និង គ្រឿងហុងស៊ុយផ្សេងៗ តាមរយៈផេក ហុងស៊ុយ ជាប្រយោជន៍សម្រាប់អ្នកចង់ស្វែងយល់ពីហុងស៊ុយក្នុងការរស់នៅប្រចាំថ្ងៃ ប្រចាំខែ និង ប្រចាំឆ្នាំ ជាដើម។ លើសពីនោះ លោកគ្រូចិនសែ ម៉ុង ក៏តែងតែចែករំលែកនូវរឿងជំនឿ ដែលគួរធ្វើ ឬមិនគួរធ្វើសម្រាប់មហាជនទូទៅថែមទៀតផង។
ថ្មីៗនេះ តាមរយៈគណនីហ្វេសប៊ុកផ្ទាល់របស់លោកគ្រូចិនសែ ម៉ុង បានបង្ហោះសារចែករំលែកនូវចំណេះដឹងថ្មីមួយទៀត សម្រាប់អ្នកកំពុងពពោះមិនទាន់ឆ្លងទន្លេ គប្បីកុំធ្វើរឿងមួយចំនួន ព្រោះអាចនាំហេតុមិនល្អក៏ថាបាន។
ក្នុងនោះ លោកគ្រូចិនសែ ម៉ុង បានរៀបរាប់ថា៖ «ចំណេះដឹងថ្មី! អំឡុងពេលពពោះមិនទាន់ឆ្លងទន្លេ សូមកុំទាន់ដំឡើងរទេះកូន ឬអង្រឹងកូនចោលអី អាចនាំហេតុមិនសូវល្អទេណាមួយកើតឡើង។ ចំណេះដឹងបន្ថែមបន្ទាប់ពីខ្ញុំមើលភាពយន្តរឿង #បូជាខ្មោចពោះធំ»។
យ៉ាងណាមិញ បើតាមចាស់ៗពីដើមដំណាលតៗគ្នាពីមុននេះ ក៏មានការហាមប្រាមកូនចៅ ឬស្រ្តីពពោះត្រៀមឆ្លងទន្លេ កុំឱ្យដំឡើងអង្រឹង ឬទិញរបស់ប្រើប្រាស់សម្រាបកូនទុកដែរ គ្រាន់តែមកដល់បច្ចុប្បន្នជំនឿមួយចំនួនក៏មានខ្លះជឿ និងខ្លះទៀតមិនសូវជឿឡើយ៕
