ដូចគេនិយាយថា អ្នកគឺជាអ្នកនិពន្ធ ជាអ្នកដឹកនាំ និង ជាអ្នកសម្តែងនៅក្នុងជីវិតរបស់អ្នក។ ហេតុដូច្នេះ ជោគវាសនាគឺស្ថិតនៅលើអ្នកជាអ្នកសម្រេច ហើយក្នុងនោះអារម្មណ៍ គឺជាអ្នកកំណត់ជោគវាសនាទាំងពេលបច្ចុប្បន្ន និង អនាគតតែម្តង។
តាមការចែករំលែករបស់ទំព័រហ្វេសប៊ុក ផ្នត់គំនិតសហគ្រិន អ្នកអាចស្វែងយល់ពី ៦ កម្រិតនៃថាមពលជីវិត ដែលវាអាចជួយអ្នករកឃើញពន្លឺ ចាកចេញពីជីវិតជាប់គាំង។
« ៦ កម្រិតនៃថាមពលជីវិត! »
អារម្មណ៍របស់យើងជាអ្នកកំណត់ស្ថានភាពបច្ចុប្បន្ន ហើយស្ថានភាពនេះនឹងសម្រេចជោគវាសនារបស់យើងទៅថ្ងៃអនាគត។ អ្នកស្ថិតនៅកម្រិតថាមពលណាមួយ អ្នកក៏កំពុងរស់នៅក្នុងវិមាត្រជីវិត ដែលស្របនឹងកម្រិតនោះដែរ។
ភាពរីកចម្រើន មិនមែនគ្រាន់តែបញ្ជាក់ខ្លួនឯងប៉ុណ្ណោះទេ ប៉ុន្តែជាការបង្កើនថាមពលជីវិតរបស់យើង ដើម្បីឱ្យជីវិតមានពន្លឺកាន់តែភ្លឺស្វាង។ ជំនួសឱ្យការជាប់គាំងនឹងភាពលំបាកបច្ចុប្បន្ន គួរងើយមុខឡើងទៅរកកម្ពស់នៃសក្តានុពលរបស់ខ្លួន។
កម្រិតថាមពលរបស់មនុស្ស៖
១. កម្រិតថាមពលខ្សោយ៖
អ្នកដែលតែងតែត្អូញត្អែរ រអ៊ូរទាំ ជាប់ជំពាក់នឹងគំនិតអវិជ្ជមាន និង រងភាពឈឺចាប់ផ្លូវចិត្តជាប្រចាំ។
២. កម្រិតថាមពលមនុស្សធម្មតា៖
អ្នកដែលគិតតែពីប្រយោជន៍ផ្ទាល់ខ្លួន ព្រងើយកន្តើយចំពោះអ្វីៗជុំវិញខ្លួន ចេះកោតសរសើរតែក៏មានចិត្តច្រណែន និង ស្អប់អ្នកដទៃ។
៣. កម្រិតថាមពលមនុស្សខ្លាំងពូកែ៖
អ្នកដែលមានភាពក្លាហាន ហ៊ានប្រឈមមុខនឹងបញ្ហា ហ៊ានផ្លាស់ប្ដូរខ្លួនឯង និង មានជំហររឹងមាំក្នុងការសម្រេចចិត្ត។
៤. កម្រិតថាមពលវីរបុរស៖
អ្នកដែលមានគំនិតផ្តួចផ្តើមខ្ពស់ សកម្មក្នុងការបង្កើតថ្មី សម្រេចបាននូវសមិទ្ធផលគួរឱ្យកត់សម្គាល់ និង មានទស្សនវិជ្ជមានគ្រប់ពេលវេលា។
៥. កម្រិតថាមពលអ្នកដឹកនាំ៖
អ្នកដែលចេះកោតសរសើរ និង ទទួលស្គាល់តម្លៃអ្នកដទៃ ចេះអធ្យាស្រ័យ និង អត់ឱនចំពោះកំហុសអ្នកក្រោមឱវាទ ចេះបរិច្ចាគ និង រួមចំណែកដល់សង្គម ចេះដឹង និង យល់ដឹងជ្រៅជ្រះ ចេះទទួលខុសត្រូវខ្ពស់ និង តែងតែគិតគូរពីប្រយោជន៍អ្នកដទៃមុនខ្លួនឯង។
៦. កម្រិតថាមពលមេដឹកនាំកំពូល៖
អ្នកដែលមានក្តីស្រឡាញ់ដ៏ធំធេងចំពោះមនុស្សជាតិទាំងមូល ប្រកបដោយប្រាជ្ញាឈ្លាសវៃ មានស្មារតីលះបង់ខ្ពស់ មានទស្សនវិស័យវែងឆ្ងាយដើម្បីអនាគត និង មានវិន័យខ្លួនឯងខ្ពស់បំផុតគ្មានអ្វីប្រៀបផ្ទឹមបាន…។
សូមជូនពរឱ្យអ្នករាល់គ្នារីកចម្រើនពីភាពខ្សោយរហូតក្លាយជាអ្នកដឹកនាំដ៏ឆ្នើម ពីអ្នកដែលគ្រាន់តែឆ្លើយតបនឹងអារម្មណ៍ ក្លាយជាអ្នកដែលអាចបង្កើតថាមពលវិជ្ជមានសម្រាប់ខ្លួនឯង និង អ្នកដទៃបានយ៉ាងពិតប្រាកដ៕
