បើឃើញប្រុសៗចេញស្ទីលញ៉ែ ៥ យ៉ាងនេះនៅថ្ងៃ ១៤ កុម្ភៈ ប្រុងខ្លួនគេចចេញទៅ គឺគេកំពុងប៉ងនាំអ្នកទៅចាក់ទឹកដូងហើយ

នៅសល់តែប៉ុន្មានថ្ងៃទៀត ទិវានៃក្តីស្រលាញ់ ​១៤ កុម្ភៈ ឬ Valentine’s Day នឹងឈានចូលមកដល់។​ ជារឿយៗ បុរសខិលខូចមួយចំនួនតែងឆ្លៀតឱកាសនេះ លួងលោមឱ្យដៃគូ ឬ នារីគូស្នេហ៍ បញ្ជាក់ក្តីស្រលាញ់តាមរយៈការស្និទ្ធស្នាល ឬ រហូតដល់ការប្រគល់ខ្លួនប្រាណ ដែលជាទង្វើត្រឹមត្រូវនោះទេ។ ដើម្បីជៀសវាងការខាតបង់ខ្លួនប្រាណ នារីៗគួរតែប្រយ័ត្នល្បិចលួងលោមរបស់បុរស ៥ យ៉ាងនេះ។

១. ចង់ទៅកន្លែងរ៉ូមែនទិកតែពីរនាក់ ឬ កន្លែងឯកជន

គេនឹងលួងលោមចង់មានពេលវេលាស្និទ្ធស្នាលតែពីរនាក់ ទៅកន្លែងស្ងប់ស្ងាត់ ឬ កន្លែងឯកជន ដូចជាផ្ទះរបស់គេ ផ្ទះសំណាក់ សណ្ឋាគារ ឬនៅដល់យប់ជ្រៅតែពីរនាក់ជាដើម។ អ្នកអាចសាកល្បងចិត្តគេ ដោយបបួលគេទៅកន្លែងមានមនុស្សអ៊ូអរ ឬ សាធារណៈវិញ បើគេមិនព្រម មានន័យថាគេពិតជាចង់បានខ្លួនប្រាណអ្នកមែន។

២. និយាយលែបខាយស៊ីជម្រៅ

មិនថាមុនជួប ឬ កំពុងជួប គេនឹងប្រើការសន្ទនាទៅរកប្រធានបទស្និទ្ធស្នាលស៊ីជម្រៅ ឬ រឿងផ្លូវភេទកាន់តែច្រើន។ គេនិយាយបែបនេះដើម្បីសាកចិត្តអ្នកផង ដុតអារម្មណ៍អ្នកផង និង ល្បួងអ្នកផង។ បើអ្នកទន់ទោរ នោះនឹងប្រឈមអស់ខ្លួនប្រាណមិនខាន។

៣. ផ្តោតជ្រុលលើរាងកាយ

ពេលជួបគ្នា គេនឹងនិយាយដដែលៗសរសើរលើរូបរាងកាយរបស់អ្នកបែបអារម្មណ៍រោលរាល ស្រើបស្រាល ឬ ផ្លូវភេទ។ ជួនអាចនិយាយពីរាងកាយ ជួនអាចនិយាយពីសម្លៀកបំពាក់។ ខណៈពេលនិយាយ ភ្នែកគេនឹងសម្លឹងមកត្រង់ចំណុច ដែលគេលើកឡើងមិនដាក់ភ្នែកឡើយ។

៤. ប្រើកាដូជានុយ

គេអាចនឹងរៀបចំកាដូជូនអ្នក ធ្វើឱ្យអ្នកទន់ចិត្តដូចជា បាច់ផ្កា របស់ប្រើថ្លៃៗ នាំទៅទទួលទានអាហារលំដាប់ៗ ឬ កាដូធ្វើឱ្យភ្ញាក់ផ្អើលជាដើម។ សកម្មភាពនេះនឹងបង្កើតឱ្យអ្នកមានអារម្មណ៍ថា នឹងត្រូវមានអ្វីមួយត្រូវតបស្នងទៅវិញ ដូចឧទាហរណ៍កើតឡើងជារឿយៗ គឺការប្រគល់ខ្លួនប្រាណនេះឯង។

៥. ជំរុញឱ្យផឹកគ្រឿងស្រវឹង

គេអាចនឹងជំរុញឱ្យអ្នកផឹកគ្រឿងស្រវឹង ដើម្បីឱ្យអ្នកឆាប់ទន់ស្មារតី ងាយចូលជិតស្និទ្ធស្នាល អាចប៉ះដៃជើងខ្លួនប្រាណ ឬ លួងលោមរហូតឈានដល់ការរួមមេត្រី៕