នៅថ្ងៃទី ២៩ ខែឧសភា ឆ្នាំ ២០២៥ នេះ រដ្ឋាករទឹកស្វយ័តក្រុងភ្នំពេញ បានជូនដំណឹងអំពីការផ្អាកផ្គត់ផ្គង់ទឹកបណ្ដោះអាសន្ន ក្នុងសង្កាត់មួយចំនួនស្ថិតក្នុងខណ្ឌចំនួន ២ នៅរាជធានីភ្នំពេញ រួមមាន ខណ្ឌចំការមន និង ខណ្ឌសែនសុខ។
តាមរយៈរដ្ឋាករទឹកស្វយ័តក្រុងភ្នំពេញបានឱ្យដឹងថា ចំពោះដំណើរការផ្អាកការផ្គត់ផ្គង់ទឹកបណ្ដោះអាសន្ននេះផងដែរ នឹងធ្វើឡើងទៅតាមពេលវេលា និង ទីតាំងដូចខាងក្រោម ៖
១. សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ នៅយប់ថ្ងៃទី ២៩ ខែឧសភា ឆ្នាំ ២០២៥
រដ្ឋាករទឹកស្វយ័តក្រុងភ្នំពេញ នឹងផ្អាកការផ្គត់ផ្គង់ទឹកលើផ្លូវលេខ ៤៨៨ ចាប់ពីផ្លូវលេខ ១០៥ ដល់ផ្លូវលេខ ៤៣០ ស្ថិតក្នុងសង្កាត់ផ្សារដើមថ្កូវ ខណ្ឌចំការមន មួយរយៈពេលខ្លីប្រមាណជា ៥ ម៉ោង គឺចាប់ពីម៉ោង ២៣ និង ០០ នាទី យប់ថ្ងៃទី ២៩ ខែឧសភា ឆ្នាំ ២០២៥ ដល់ម៉ោង ០៤ និង ០០ នាទី ព្រឹកថ្ងៃទី ៣០ ខែឧសភា ឆ្នាំ ២០២៥។ ក្នុងការអនុវត្តការងារនេះ អាចធ្វើឱ្យគុណភាពទឹកមានភាពល្អក់កករ ក្នុងរយៈពេលខ្លីក្រោយពីធ្វើការកែសម្រួលរួច។
២. សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ នៅយប់ថ្ងៃទី ៣០ ខែឧសភា ឆ្នាំ ២០២៥
រដ្ឋាករទឹកស្វយ័តក្រុងភ្នំពេញ គ្រោងកាត់ភ្ជាប់បំពង់ចែកចាយទឹកថ្មីទំហំ ១១០ មម ចំនួន ០១ ទីតាំងនៅលើផ្លូវលេខ ៧០៩K-៣ ដែលនឹងត្រូវផ្អាកការផ្គត់ផ្គង់ទឹកនៅលើផ្លូវលេខ ៤១០K ដល់ផ្លូវលេខ ៤៣២K នៅក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ នៅយប់ថ្ងៃទី ៣០ ខែឧសភា ឆ្នាំ ២០២៥។ ការងារកាត់ភ្ជាប់បំពង់ទឹកថ្មីនេះ តម្រូវឱ្យផ្អាកការផ្គត់ផ្គង់ទឹកមួយរយៈពេល ចាប់ពីម៉ោង ២២:០០ នាទីយប់ រហូតដល់បញ្ចប់ការដ្ឋាន និង អាចធ្វើឱ្យគុណភាពទឹកមានភាពល្អក់កករក្នុងរយៈពេលខ្លី៕
សូមអានសេចក្ដីលម្អិតបន្ថែមនៅខាងក្រោម ៖
