បើកទឹកទុកប្រើផង! ចាប់ពីយប់នេះ សង្កាត់មួយចំនួនក្នុងខណ្ឌចំនួន ២ នឹងដាច់ទឹកប្រើប្រាស់តាមពេលវេលាកំណត់

នាពេលថ្មីៗនេះ រដ្ឋាករទឹកស្វយ័តក្រុងភ្នំពេញ បានជូនដំណឹងអំពីការផ្អាកផ្គត់ផ្គង់ទឹកបណ្ដោះអាសន្ន ក្នុងសង្កាត់មួយចំនួនស្ថិតក្នុងខណ្ឌចំនួន ២ នៅរាជធានីភ្នំពេញ រួមមាន ខណ្ឌឫស្សីកែវ និង ខណ្ឌមានជ័យ។

តាមរយៈ រដ្ឋាករទឹកស្វយ័តក្រុងភ្នំពេញ ចំពោះដំណើរការផ្អាកការផ្គត់ផ្គង់ទឹកបណ្ដោះអាសន្ននេះដែរ នឹងធ្វើឡើងទៅតាមពេលវេលា និង ទីតាំងដូចខាងក្រោម ៖

១. សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ នៅយប់ថ្ងៃទី ៣០ ខែមេសា ឆ្នាំ ២០២៥

រដ្ឋាករទឹកស្វយ័ត គ្រោងដំឡើងវ៉ានលើបំពង់ទំហំ ៣០០ មម ចំនួន ១ ទីតាំង នៅលើផ្លូវលេខ ៥៩៨ ដែលនឹងត្រូវផ្អាកផ្គត់ផ្គង់ទឹក ចាប់ពីផ្លូវលេខ ៣៥៥ រហូតដល់ផ្លូវលេខ ៥០R ស្ថិតក្នុងសង្កាត់ទួលសង្កែទី២ នៃខណ្ឌឫស្សីកែវ រាជធានីភ្នំពេញ នៅយប់ថ្ងៃទី ៣០ ខែមេសា ឆ្នាំ ២០២៥ ចាប់ពីម៉ោង ២២:០០ នាទីយប់ រហូតដល់បញ្ចប់ការងារការដ្ឋាន។ ការងារនេះ តម្រូវឱ្យធ្វើការផ្អាកផ្គត់ផ្គង់ទឹកមួយរយៈពេលខ្លី និង អាចធ្វើឱ្យគុណភាពទឹកមានភាពល្អក់កករក្នុងរយៈពេលខ្លី ក្រោយពេលកាត់ភ្ជាប់ដំឡើងវ៉ានរួច។

២. សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ នៅយប់ថ្ងៃទី ០២ ខែឧសភា ឆ្នាំ ២០២៥

រដ្ឋាករទឹកស្វយ័តក្រុងភ្នំពេញ នឹងជីកកាត់តភ្ជាប់បំពង់មេនាំទឹកថ្មីទំហំ ៣០០ មម ទៅទំហំ ១៦០ មម នៅលើផ្លូវលេខ ៣៧១ (NT) ចន្លោះផ្លូវលេខ ៣២BT-១០០BT ដែលនឹងត្រូវផ្អាកការផ្គត់ផ្គង់ទឹក ស្ថិតនៅក្នុងភូមិសាស្ត្រ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ នៅយប់ថ្ងៃទី ០២ ខែឧសភា ឆ្នាំ ២០២៥។ ការងារនេះតម្រូវឱ្យផ្អាកការផ្គត់ផ្គង់ទឹកមួយរយៈពេលគឺ ចាប់ពីម៉ោង ២២:០០ នាទីយប់ រហូតដល់បញ្ចប់ការងារការដ្ឋាន និង អាចធ្វើឱ្យគុណភាពទឹកមានភាពល្អក់កករបន្តិចបន្តួច ក្រោយពេលជីកកាត់តភ្ជាប់បំពង់មេនាំទឹកថ្មីទំហំ ៣០០ មម នេះរួច៕

សូមអានសេចក្ដីលម្អិតបន្ថែមនៅខាងក្រោម ៖