ថ្មីៗនេះ កម្មវិធីប្រកួតសម្រស់ដ៏អស្ចារ្យ Miss Universe Cambodia 2025 បានបើកប្រកាសទទួលពាក្យជាផ្លូវការហើយ ដែលត្រៀមដំណើរការប្រកួតជ្រើសរើសរាជិនីមកុដ Miss Universe Cambodia ប្រចាំឆ្នាំ ២០២៥ ដែលបន្តតំណែងពីអ្នកនាង ប្រាសាទ ដាវីន Miss Universe Cambodia 2024។
ស្របពេលនេះដែរ លើបណ្ដាញសង្គមមហាជនអ្នកគាំទ្រវិស័យបវរកញ្ញាកម្ពុជាជាច្រើន និង អ្នកតាមដានកម្មវិធី Miss Universe Cambodia ក៏កំពុងទន្ទឹងរងចាំមើលថា តើស្រីស្អាតរូបណាខ្លះនឹងមានវត្តមានជាបេក្ខភាពក្នុងកម្មវិធីប្រកួតនេះដែរ។
ជាក់ស្ដែង ខណៈកម្មវិធីប្រកាសទទួលពាក្យនេះដែរ អ្វីដែលធ្វើឱ្យអ្នកគាំទ្រកំពុងចាប់អារម្មណ៍ខ្លាំង ក្រោយពីបានឃើញស្រីស្អាត រ៉េត ស្រីនាថ ដែលជាបវរកញ្ញាដ៏មានបទពិសោធមួយរូប និង ជាម្ចាស់មកុដ Miss CosmoWorld Cambodia 2023 ក៏បានប្រកាសបង្ហាញវត្តមានដំបូងគេ ដោយបានដាក់ពាក្យចូលប្រកួតក្នុងកម្មវិធី Miss Universe Cambodia 2025 ហើយ។
ក្រោយឃើញវត្តមានរបស់កញ្ញា រ៉េត ស្រីនាថ ដាក់ពាក្យប្រកួតម្ដងទៀតក្នុងកម្មវិធីដ៏ធំនេះដែរ មហាជនអ្នកគាំទ្រក៏បានបង្ហាញការគាំទ្រយ៉ាងពេញទំហឹង និង ជូនពរនាងក្នុងដំណើរប្រកួតនេះទទួលបានជោគជ័យផងដែរ។ គួរឱ្យដឹងដែរថា កញ្ញា រ៉េត ស្រីនាថ គឺជាប្អូនស្រីបង្កើតរបស់កញ្ញា រ៉េត សារីតា ដែលជាម្ចាស់មកុដ Miss Universe Cambodia 2020 ផងដែរ៕
