នៅព្រឹកថ្ងៃទី ៣០ ខែកក្កដា ឆ្នាំ ២០២៥ នេះ តារយៈផេក ហុងស៊ុយ របស់លោកគ្រូចិនសែម៉ុង បានចែករំលែកឱ្យបានដឹងថា នៅថ្ងៃទី ៣១ ខែកក្កដា ឆ្នាំ ២០២៥ ស្អែកនេះ វេលាម៉ោងចាប់ពីម៉ោង ០៥៖០០ ព្រឹក ដល់ ០៧៖០០ ព្រឹក គឺជាវេលាដ៏ល្អសម្រាប់ធ្វើ «កិច្ចសងគុណ» ដឹងគុណ ឬ កិច្ចទទួលទ័ពត្រឡប់មកវិញ សម្រាប់អ្នកដែលមានជំនឿ។
ក្នុងនោះលោកគ្រូហុងស៊ុយបែបវិទ្យាសាស្ត្ររូបនេះ បានបញ្ជាក់ពីគ្រឿងថ្វាយរួមមាន ៖
– ផ្កាឈូក ៣ ដើម ពណ៌អ្វីក៏បានដែរ
– នំអន្សម ២ ឬច្រើនជាងនេះ តាមលទ្ធភាព
– នំគម នំបត់ លាយគ្នាចំនួន ៤ នំ ឬច្រើនជាងនេះ តាមលទ្ធភាព
– ផ្លែឈើ ៥ មុខ ( ចេកណាំវ៉ា ដាច់ខាតត្រូវតែមាន )
– ទឹកដូង ១ ផ្លែ ( ដូងក្រអូបកាន់តែល្អ )
– ទៀនក្រមួន ឬទៀនលឿង ៣ ដើម ពេលដុត គឺត្រូវដាក់ជាប់គ្នា ឬផ្គួមគ្នា ដុតរួមគ្នាតែម្ដង
– ធូបមានផ្សែង ៩ សសៃរ
– ស្លាម្លូរបារី ១ ឈុត
– ទឹកស្អាត ១ ផ្លិល
– ត្រៀមទឹកអប់
ចំពោះការរៀបចំ គឺត្រូវរៀបតុស្អាតល្មមមួយ ដាក់នៅមុខផ្ទះ ឬនៅជាប់ផ្លូវ រៀបចំគ្រឿងដង្វាយខាងលើឱ្យស្អាត និង ធ្វើកិច្ចដូចខាងក្រោម៖
១. សំពះបីដង អាចក្រាបដល់ដីកាន់តែល្អ
២. ដុតទៀន ដែលដាក់ផ្គួមគ្នា ៣ ដើមនោះឲ្យឆេះ
៣. អុចធូប ៩ សសៃរនោះ
៤. សំពះបីដង រួចនិយាយ ( កូនចៅសូមធ្វើដឹងគុណដល់បារមីមេទ័ពទាំងឡាយដែលខ្ញុំបានធ្វើកិច្ចសុំកិច្ចសុខកន្លងមកនេះ ខ្ញុំសូមថ្វាយនូវគ្រឿងដង្វាយទាំងនេះ រួមមាន ……រៀបរាប់គ្រឿងដែលបានដាក់ថ្វាយ…….. សូមថ្វាយបុណ្យកុសលដែលខ្ញុំបានសាង ថ្វាយដល់អស់លោកមេទ័ពទាំងឡាយ សូមឱ្យខ្ញុំបានសុខ រួចផុតទុក្ខ សូមឱ្យជាតិនរគខ្មែរបានសុខ រួចផុតទុក្ខ) សំពះបីដងទៀត ដោតធូបលើផ្លែឈើ
៥. យកទឹកអប់ បាញ់លើគ្រឿងសំណែង ៣ ដង
៦. យកទឹកអប់ បាញ់ក្នុងទឹកស្អាត ៣ ដង
៧. ពេលទៀន ឬ ធូប ឆេះបានប្រហែល ១២ នាទី យកទឹកស្អាតចាក់លើដី ឬបេតុង ចាក់តិចៗរហូតដល់អស់ លើដៃសំពះ
៨. ពេលអស់ធូប យកទឹកដូងលើដី ឬបេតុងឱ្យអស់
៩. លុះអស់ធូប អាចប្រមូលស្លាម្លូរបារី និង ផ្កាឈូកបោះចោលបានធម្មតា
១០. សម្រាប់គ្រឿងដង្វាយជាអាហារ អាចចែកអ្នកក្រីក្របាន៕
