ថ្មីៗនេះ មហាជននិយមតាមដានបណ្តាញសង្គមច្បាស់ជាបានជ្រាបមកហើយ ពីប្អូនស្រីជនភៀសសឹកដែលកំពុងផ្ទុះការចាប់អារម្មណ៍ ចេះនិយាយ ៤ ភាសា តាមរយៈការរៀនតាមអនឡាញដោយខ្លួនឯង មានឈ្មោះហៅក្រៅថា Nelly។
ក្នុងនោះដែរ Nelly ត្រូវបានផ្ទុះការចាប់អារម្មណ៍បន្ទាប់ពីអ្នកផលិតមាតិកាល្បីម្ចាស់ Channel Youtube «China Mac Tv» ឈ្មោះ Raymond Yu បានធ្វើដំណើរទៅកាន់តំបន់ភៀសសឹកដើម្បីចែកអំណោយជូនដល់បងប្អូនកម្ពុជានៅទីនោះ និង បានជួបសំណេះសំណាលជាមួយ Nelly បន្ទាប់ពីលោកឃើញថាក្មេងស្រីកម្ពុជារូបនេះ ចេះនិយាយភាសាបរទេសបានយ៉ាងល្អ និង ស្ម័គ្រចិត្តធ្វើជាអ្នកបកប្រែឱ្យលោកនាពេលនោះ។
បន្ទាប់ពី វីដេអូរបស់ Raymond Yu បានចេញផ្សាយ និង មានការទស្សនាច្រើនទាំងក្នុង និង ក្រៅប្រទេសកម្ពុជានោះ ក៏មានអ្នកលេងបណ្តាញសង្គមបានកាត់យកត្រង់ការសន្ទនារបស់ Nelly និង លោក Raymond Yu ទៅបង្ហោះបន្ត ជាហេតុធ្វើឱ្យមហាជន អាណិតស្រឡាញ់ និង សរសើរដល់នាង រហូតមានការជួយឧត្ថម្ភជាថវិកា និង ឱ្យនាងបានសិក្សាបន្តដោយឥតគិតថ្លៃថែមទៀតផង។ លើសពីនោះ អ្នកម្តាយ និង បងៗរបស់នាង ក៏ទទួលបានការងារធ្វើដែរ។
ក្រោយឃើញ Nelly ទទួលបានក្តីអាណិតស្រឡាញ់ និង ឧត្ថម្ភជាបន្តបន្ទាប់នោះ មហាជនជាច្រើនក៏បាននឹកអរគុណដល់លោក Raymond Yu ដែលជាបុគ្គលមួយរូបដំបូងគេ ធ្វើឱ្យ Nelly ទទួលបានការចាប់អារម្មណ៍ក្រោយលោកបានផលិតវីដេអូនោះ។
លើសពីនោះទៀត ប្រជាជនកម្ពុជាក៏បានអរគុណដល់ Raymond ដែលបានមកកាន់ប្រទេសកម្ពុជា ចំណាយថវិកាផ្ទាល់យ៉ាងច្រើនទិញអាហារ សម្ភារប្រើប្រាស់ របស់របរក្មេងលេង ជូនដល់ជនភៀសសឹកទៀតផង៕
