បុណ្យ ១០០ ថ្ងៃចប់សព្វគ្រប់! បងស្រី RuthKo ដង្ហោយរកយុត្តិធម៌ឱ្យប្អូនប្រុស ខណៈមកដល់ពេលនេះនៅស្ងាត់ឈឹងមិនទាន់មានពន្លឺនៅឡើយ

ធ្មេចបើកៗ រយៈពេលជិត ៣ ខែហើយ ដែលតារាចម្រៀងមានប្រជាប្រិយភាព លោក RuthKo បានលាចាកលោកក្នុងគ្រោះថ្នាក់ចរាចរណ៍លាក្រុមគ្រួសារ មិត្តភក្តិ និង អ្នកគាំទ្រយ៉ាងអាឡោះអាល័យ កាលពីយប់រំលងអធ្រាត្រថ្ងៃទី ០៦ ខែមករា ឆ្នាំ ២០២៥ កន្លងទៅ។

បើទោះជាពេលវេលាប្រមាណជិត ៣ ខែកន្លងហួសក្តី តែក្រុមគ្រួសារ មិត្តភក្តិ និង អ្នកគាំទ្រនៅតែមិនទាន់អស់ចិត្តនៃការចាកចេញរបស់ លោក RuthKo ដែលជាកូនល្អ មិត្តល្អ និង ធនធានមនុស្សដ៏សំខាន់ក្នុងវិស័យសិល្បៈមួយរូបនេះបានឡើយ។

យ៉ាងណាមិញ នៅថ្ងៃទី ២៨ និង ទី ២៩ ខែមីនា ឆ្នាំ ២០២៥ កន្លងទៅនេះ ពិធីបុណ្យ ១០០ ថ្ងៃ លោក RuthKo ក៏បានរៀបចំរួចរាល់ហើយដែរ ដោយពិធីបុណ្យអ្នកម្តាយ លោក RuthKo បានរៀបចំយ៉ាងស្ងប់ស្ងាត់នៅ វត្តកោះអណ្តែត ឃុំតាតៃក្រោម ស្រុកកោះកុង ខេត្តកោះកុង ជាទីអារាម លោក RuthKo ធ្លាប់បួសកាលនៅមានជីវិត។

ដោយឡែក ក្រោយពិធីបុណ្យសព ១០០ ថ្ងៃ លោក RuthKo បានរៀបចំសព្វគ្រប់ហើយនោះ នៅថ្ងៃទី ០១ ខែមេសា ឆ្នាំ ២០២៥ កន្លងទៅនេះ បងស្រីបង្កើតលោក RuthKo បានបង្ហោះសារដង្ហោយរកយុត្តិធម៌ឱ្យប្អូនប្រុស ខណៈក្រុមគ្រួសារស្ពាញការឈឺចាប់មួយជីវិត គ្មានថ្ងៃព្យាបាលបាន។

សារនោះ បងស្រីបង្កើតលោក RuthKo រៀបរាប់ថា៖ «១០០ ថ្ងៃ ធ្វើរួចចប់សព្វគ្រប់ហើយ តែករណីប្អូនខ្ញុំនៅតែស្ងាត់ឈឹងមិនមានពន្លឺដដែល។ គ្រួសារក៏នៅតែបន្តភាពក្រៀមក្រំខ្លោចផ្សា ដេកនឹក ដេកយំ ដេកសោកស្តាយ ដេកឈឺចាប់ដដែល។ យូរទៅស្ងាត់ទៅៗ! ស្ងាត់យូរៗទៅ ក្រែងអ្នកដទៃអាចភ្លេច តែខ្ញុំ ម្តាយខ្ញុំ និង ក្រុមគ្រួសារខ្ញុំអត់ភ្លេចទេ។ នៅស្ពាយសេចក្តីឈឺចាប់អស់មួយជីវិត អត់មានថ្នាំព្យាបាលទេ»៕