គ្រប់កន្លែងធ្វើការ មិនថាតូច ឬ ធំ តែងជៀសមិនផុតពីបញ្ហាវិវាទ ឬ ទំនាស់ រវាងបុគ្គលិក ហើយការគ្រប់គ្រងវិវាទរវាងបុគ្គលិកនេះហើយ គឺជាកិច្ចការដ៏សំខាន់មួយសម្រាប់អ្នកគ្រប់គ្រង ដើម្បីរក្សាបរិយាកាសការងារប្រកបដោយភាពសុខដុមរមនា និង បង្កើនផលិតភាព។ វិវាទអាចកើតឡើងដោយសារបញ្ហាទំនាក់ទំនង ការយល់ច្រឡំ ឬ ការប្រកួតប្រជែង។
ខាងក្រោមនេះជាជំហានសំខាន់ៗក្នុងការគ្រប់គ្រងវិវាទរវាងបុគ្គលិក៖
១. ស្តាប់ដោយស្ងៀមស្ងាត់ និង ដោយយុត្តិធម៌
នៅពេលមានវិវាទ អ្នកគួរតែស្តាប់ភាគីទាំងពីរដោយឡែកពីគ្នា និង ដោយមិនលម្អៀង។ កុំទាន់អាលវាយតម្លៃ ឬ សន្និដ្ឋានអ្វីមួយរហូតដល់អ្នកបានប្រមូលព័ត៌មានគ្រប់គ្រាន់ពីគ្រប់ភាគីដែលពាក់ព័ន្ធ។
២. ស្វែងរកឫសគល់នៃបញ្ហា
ជំនួសឱ្យការដោះស្រាយតែរឿងតូចតាច អ្នកត្រូវព្យាយាមស្វែងរកមូលហេតុពិតប្រាកដដែលបង្កឱ្យមានវិវាទ។ តើវាបណ្តាលមកពីការយល់ច្រឡំ ការប្រកួតប្រជែង ឬ បញ្ហាផ្ទាល់ខ្លួន? ការយល់ដឹងពីមូលហេតុពិតនឹងជួយឱ្យអ្នកដោះស្រាយបញ្ហាបានយ៉ាងត្រឹមត្រូវ។
៣. ពិភាក្សាគ្នាដើម្បីស្វែងរកដំណោះស្រាយ
* រៀបចំការប្រជុំរួមគ្នា៖ អញ្ជើញភាគីទាំងពីរឱ្យចូលរួមប្រជុំ ដើម្បីពិភាក្សាគ្នាដោយបើកចំហ។
* កំណត់គោលការណ៍ពិភាក្សា៖ ត្រូវប្រាកដថាអ្នកគ្រប់គ្រងការពិភាក្សាឱ្យបានល្អ និង កុំឱ្យភាគីណាមួយបញ្ចេញកំហឹងខ្លាំងពេក។ គោលដៅគឺត្រូវរកដំណោះស្រាយ មិនមែនស្វែងរកអ្នកខុសនោះទេ។
* ជួយពួកគេឱ្យយល់ពីគ្នាទៅវិញទៅមក៖ លើកទឹកចិត្តឱ្យភាគីទាំងពីរ យល់ពីទស្សនរបស់គ្នាទៅវិញទៅមក។ ការយល់ចិត្តគ្នាអាចជួយកាត់បន្ថយភាពតានតឹងបានយ៉ាងច្រើន។
៤. ផ្តល់អនុសាសន៍ និង តាមដានលទ្ធផល
ប្រសិនបើពួកគេមិនអាចរកដំណោះស្រាយដោយខ្លួនឯងបាន អ្នកត្រូវផ្តល់អនុសាសន៍ដើម្បីបញ្ចប់វិវាទ។
* កំណត់ផែនការសកម្មភាព៖ ត្រូវមានផែនការច្បាស់លាស់ពីរបៀបដោះស្រាយបញ្ហានៅពេលអនាគត។
* តាមដានលទ្ធផល៖ តាមដានពីការអនុវត្តរបស់ភាគីទាំងពីរក្រោយពីការដោះស្រាយវិវាទ ដើម្បីធានាថាបញ្ហានឹងមិនកើតឡើងម្តងទៀត។
ការគ្រប់គ្រងវិវាទទាមទារភាពអត់ធ្មត់ ភាពយុត្តិធម៌ និង ការយល់ចិត្ត។ នៅពេលអ្នកអាចដោះស្រាយបញ្ហាបានដោយជោគជ័យ នោះវានឹងជួយពង្រឹងទំនាក់ទំនងរវាងបុគ្គលិក និងធ្វើឱ្យបរិយាកាសការងារកាន់តែប្រសើរឡើង៕
ប្រភព៖ ឯកសារច្បាប់ និង រដ្ឋបាល
