ជាការពិតណាស់ អ្នកគាំទ្រ និយមតានដានពីក្រុមគ្រួសាររបស់កំពូលតារាចម្រៀង ឧកញ៉ា ព្រាប សុវត្ថិ ច្បាស់ជាបានជ្រាបមកហើយ ពីទំហំប្រជាប្រិយភាពរបស់ ឧកញ៉ា និង កូនៗទាំង ៣ របស់ឧកញ៉ា រួមមាន លោក សុវត្ថិ មុនីវណ្ណ, លោក សុវត្ថ មុនីនាគ និង លោក សុវត្ថិ សិរីវុឌ្ឍ។
តួយ៉ាង ងាកមកកាន់កូនប្រុសច្បងរបស់ ឧកញ៉ា ព្រាប សុវត្ថិ គឺលោក សុវត្ថិ មុនីវណ្ណ ឯណោះវិញ បច្ចុប្បន្ន កំពុងតែក្លាយជាតារាចម្រៀងជំនាន់ថ្មី ទទួលបានប្រជាប្រិយភាពមិនខុសពីឪពុកនោះឡើយ។
ក្នុងនោះ មិនត្រឹមតែជាអ្នកចម្រៀងជំនាន់ថ្មី អាចបកស្រាយបទចម្រៀងបានគ្រប់ទម្រង់នោះទេ ពោលគឺលោក សុវត្ថ មុនីវណ្ណ មានជំនាញផ្នែករាំ ផ្នែកតន្ត្រី និពន្ធទំនុកភ្លេង ទំនុកច្រៀងបានទៀតផង។
ស្របពេលទីផ្សារការងារសិល្បៈ កំពុងល្បីល្បាញ និង មមាញឹក ថ្មីៗនេះកំលោះសង្ហា សុវត្ថ មុនីវណ្ណ ត្រៀមនឹងក្លាយជាថៅកែហាងកាហ្វេ ដោយហាងរបស់លោកកំពុងតែរៀបចំដេគ័រ។ ក្នុងនោះ ហាងកាហ្វេរបស់លោក សុវត្ថ មុនីវណ្ណ មានយីហោថា «SMV Café» ដែលត្រៀមរៀបចំដំណើរការក្នុងពេលឆាប់ៗនេះ៕
