កន្លែងធ្វើការអាចថាជាផ្ទះមួយទៀត មានមេ មានកូនចៅ តាមលំដាប់លំដោយដូចជាគ្រួសារមួយផងដែរ។ ខុសប្លែកតែម្យ៉ាង កន្លែងធ្វើការជាកន្លែងប្រជុំមនុស្សមកពីគ្រប់មជ្ឈដ្ឋាន មានអត្តចរិត ពណ៌សម្បុរ និង ជាតិសាសន៍ខុសៗគ្នា។ ការចុះសម្រុងជាមួយក្រុមការងារ ជាផ្នែកមួយដ៏សំខាន់ ដែលជួយឱ្យទំនាក់ទំនងការងារ និង ផលិតភាពការងារប្រកបទៅដោយរលូន។ តែយ៉ាងណាមិញ មិនថាក្រុមហ៊ុនធំប៉ុនណា ហោចណាស់នៅតែមានបុគ្គលិក Toxic ឬបំពុល ៦ ប្រភេទ តែងនាំរឿងចម្រូងចម្រាស ជាពិសេស ពូកែយករួចខ្លួន មិនងាយក្រុមហ៊ុនចាប់បានឬដកចេញទាល់តែសោះ។
១. អែបអប អួតអាង
មនុស្សបែបនេះភាគច្រើនខ្សោយគំនិត តែពូកែខាងផ្គាប់ផ្គុនរណេបរណិបដើម្បីឱ្យបានប្រយោជន៍។ ពួកគេព្យាយាមស្និទ្ធស្នាលតែមនុស្សណាដែលមានប្រយោជន៍សម្រាប់គេ ហើយក្រោយអស់ប្រយោជន៍ គេក៏នឹងលែងខ្វល់ទៅរកអ្នកដទៃដែលមានប្រយោជន៍បន្តទៀត។ ពួកគេចាត់ទុកអ្នកមានប្រយោជន៍ជាស្ពានចម្លងពីបញ្ហា និង ជាការលើកមុខមាត់ខ្លួនឯង។ បើនរណាម្នាក់នៅជិត អាចមានហានិភ័យខ្ពស់ ព្រោះពេលមានបញ្ហា គេនឹងទម្លាក់បញ្ហាទៅអ្នកដែលនៅជិតគេបំផុត។
២. ច្រណែនឈ្នានីស
គេថាកន្លែងធ្វើការដូចជាជម្លោះក្នុងរាជវាំង។ មិនខុសនោះទេ នេះក៏ព្រោះតែកន្លែងធ្វើការមានមនុស្សដែលពូកែឈ្នានីសសឹងតែគ្រប់រឿងនេះឯង។ ពួកគេមិនស្រណុកចិត្តឡើយ បើមាននរណាម្នាក់ធ្វើអ្វីបានល្អជាងខ្លួន ឬបានគុណសម្បត្តិច្រើនជាងខ្លួន។ បុគ្គលប្រភេទនេះ ឈាមត្រជាក់ ពូកែលួងលោម បើប្រហែសអាចចាក់ពីក្រោយខ្នងមួយរំពេច។
៣. បង្កើតបក្សពួក
ការបង្កើតបក្សពួកផ្តោតទៅលើអ្នកដែលកៀរគរគ្នាដោយកាន់យកទស្សនៈតែមួយ ជាពិសេសការច្រណែនឈ្នានីស។ ធាតុពិតជាក់ស្តែងបុគ្គលប្រភេទនេះ សុទ្ធតែជាមនុស្សដែលមិនព្រមទទួលស្គាល់ការពិត ហើយរីកចម្រើនតែរឿងនិយាយដើមស៊ីត្រាវធ្វើទុក្ខបុកម្នេញ។ បើអ្នកស្គាល់ និង ដឹងចរិត ច្បាស់ណាស់គេមិនហ៊ានរាប់យូរឡើយ ព្រោះគេគិតថាមនុស្សប្រភេទនេះជាមនុស្សគ្រោះថ្នាក់ ពេលមានបញ្ហានឹងអូសទាញទៅទាំងក្រុម។
៤. អាត្មានិយម
ចង់អ្នកណាស្លាប់ឬរស់ គេមិនខ្វល់ គេខ្វល់តែម្យ៉ាងគឺប្រយោជន៍ខ្លួនឯង។ បុគ្គលប្រភេទនេះចូលចិត្តធ្វើអ្វីស្រួលៗ ពេលការងារសម្រេចជាក្រុម គេតែងលើដាក់មុខមាត់មកពីគេគ្រប់យ៉ាង។ តែបើមានបញ្ហា ច្បាស់ណាស់គេនឹងឆ្លើយយករួចខ្លួនមួយរំពេច។
៥. យកតែមុខមាត់ តែការងារគ្មានសាច់ការ
មិនខុសពីបុគ្គលអាត្មានិយម បុគ្គលប្រភេទនេះបានតែមាត់ តែលទ្ធភាព និង សមត្ថភាព ឱ្យសូន្យលើសូន្យ។ អ្នកដែលរាប់អាន ច្រើនតែចាញ់បោកឱ្យគេប្រើ។
៦. ចង់បានប្រាក់ខែខ្ពស់ តែខ្ជិលច្រអូសហើយរអ៊ូច្រើន
មនុស្សខ្ជិលតែងចង់ធ្វើអ្វីស្រួលៗ និង មិនចង់អភិវឌ្ឍន៍ខ្លួនឡើយ។ គេនឹងកៀរគរមនុស្សជិតខ្លួនឱ្យមានគំនិតដូចគ្នា ហើយបង្កើតការទាមទារលើសពីអ្វីដែលខ្លួនបានធ្វើ៕
