ថ្មីៗនេះ តារាចម្រៀងប៉ុប Jessie J ម្ចាស់បទ Price Tag បានបង្ហោះវីដេអូចែករំលែកអំពីបទពិសោធផ្ទាល់ខ្លួន ដែលកំពុងកើតជំងឺមហារីកសុដន់ ក្រោយនាងទទួលបានការវះកាត់រួចរាល់ប៉ុន្មានសប្តាហ៍មកនេះ។
ជាវីដេអូផ្តល់ដំណឹងទៅកាន់អ្នកគាំទ្រ នាងបាននិយាយថា៖ «ខ្ញុំនឹងបង្ហាញពីភាពល្អ និង លំបាកណាមួយនៃដំណើរដែលខ្ញុំឆ្លងកាត់។ ខ្ញុំសូមអរគុណយ៉ាងខ្លាំងចំពោះគ្រូពេទ្យ គ្រូពេទ្យវះកាត់ និង គិលានុបដ្ឋាយិកាទាំងអស់ ដែលបានមើលថែខ្ញុំ និង ក្រុមគ្រួសាររបស់ខ្ញុំ ក៏ដូចជាមិត្តភក្តិ ដែលបានមកសួរសុខទុក្ខ»។
ដោយឡែក នៅក្នុងឃ្លីបវីដេអូមួយ នាងបានពន្យល់កូនប្រុសរបស់នាងថា ការវះកាត់គឺពាក់ព័ន្ធនឹងឈាមរបស់នាង ដែលត្រូវបង្ហូរចេញពីសុដន់តាមរយៈទុយោទៅកាន់ដប។
មែនទែនទៅ ការប្រឈមជំងឺនេះ នាងបានប្រាប់អ្នកគាំទ្រនៅលើបណ្តាញសង្គមកាលពីដើមខែមិថុនា។ នាងប្រាប់អ្នកគាំទ្រថា នាងបានរៀនពីរោគសញ្ញាជំងឺមហារីកសុដន់ ដែលបានកើតឡើងមកលើខ្លួនអស់រយៈពេល ៣ ខែ មុនពេលបទចម្រៀងចំណងជើង «No Secrets» របស់នាងត្រូវបានបញ្ចេញនៅក្នុងខែមេសា។
មុនពេលវះកាត់ នាងក៏បានប្រកាសប្រាប់ហ្វេនៗផងដែរថា នាងនឹងត្រូវបាត់មុខមួយរយៈ។ បច្ចុប្បន្ន ក្រោយការវះកាត់ នាងបានត្រលប់ទៅសម្រាកនៅផ្ទះ និង រង់ចាំលទ្ធផលបន្តទៀត៕
ប្រភព៖ NYP
