បើរំឭកកាលពីអំឡុងឆ្នាំ ១៩៩៨ មហាជនមួយចំនួនអាចនឹងនៅចាំតារាចម្រៀងកូនកាត់ចិន លោក អ៊ឹង ជុងហ៊ាន ដែលមានភាពល្បីល្បាញខ្លាំងនៅអំឡុងឆ្នាំ ១៩៩៨ ដោយលោកមានកេរ្តិ៍ឈ្មោះល្បីល្បាញ តាមរយៈសមត្ថភាព ទេពសកោសល្យអាចច្រៀងបានច្រើនភាសា ជាពិសេសនោះ គឺភាសាចិនតែម្តង។
លើសពីនេះ កាលជំនាន់នោះចម្រៀងជាភាសាចិន ដែលធ្វើឱ្យលោក អ៊ឹង ជុងហ៊ាង មានការគាំទ្រកាន់តែខ្លាំង គឺបទ «តុលាការមុខដែក» ឬបទ «ប៉ាវចិន» និង មានបទចម្រៀងល្បីៗមួយចំនួនទៀតផងដែរ។
ដោយឡែក រយៈពេលប្រមាណជាង ១០ ឆ្នាំមកនេះ មហាជនជាច្រើន សឹងនឹងភ្លេចមុខតារាចម្រៀងប្រុសរូបនេះមិនខាន ក៏ព្រោះលោកមិនដែលបង្ហាញវត្តមានក្នុងកញ្ចក់ទូរទស្សន៍ ឬ កម្មវិធីកម្សាន្តនានានោះឡើយ ដែលជាហេតុធ្វើឱ្យមានការយល់ច្រឡំថា លោក អ៊ឹង ជុងហ៊ាង បានឈប់លើវិស័យសិល្បៈហើយ។
យ៉ាងណាមិញ ថ្មីៗនេះ លោក អ៊ឹង ជុងហ៊ាង បានបង្ហាញវត្តមានក្នុងកម្មវិធី VTalk Confession និង បានទម្លាយពីការបាត់មុខឈឹងលើកញ្ចក់ទូរទស្សន៍រយៈពេល ១០ ឆ្នាំមកនេះ ថាលោកមិនទាន់ឈប់ពីអាជីពសិល្បៈនោះទេ ពោលគឺលោកនៅច្រៀងតាមកម្មវិធីនានានៅឡើយ គ្រាន់តែមិនបានបង្ហាញវត្តមានលើកញ្ចក់ទូរទស្សន៍ប៉ុណ្ណោះ។
លោក អ៊ឹង ជុងហ៊ាង ក៏បានបញ្ជាក់ពីមូលហេតុនៃការមិនចូលរួមកម្មវិធីកម្សាន្ត ឬ កម្មវិធីប្រគំតន្ត្រីតាមកញ្ចក់ទូរទស្សន៍ ព្រោះការពិតទៅកន្លងមកធ្លាប់មានគេហៅ តែលោកចេះតែបដិសេធ ដូច្នេះហើយ បដិសេធម្តងទៅ ២ ដង គេក៏លែងហៅ។ ម្យ៉ាងវិញទៀត លោកថា ពេលឡើងឆាករាងអៀនខ្លាចកាមេរ៉ា។
លោកបានបន្តទៀតថា ៖ «មួយរយៈធំលោកបានមុខលើកកញ្ចក់ទូរទស្សន៍ ដូច្នេះមហាជនគិតថាលោកឈប់ពីអាជីពសិល្បៈហើយ តែតាមពិតទៅលោកនៅមិនទាន់ឈប់ទេ លោកនៅបន្តអាជីពសិល្បៈក្នុងក្រុមភ្លេងធម្មតា ព្រោះលោកមានក្រុមភ្លេងផ្ទាល់ខ្លួន តែដោយមិនសូវបង្ហាញមុខក្នុងទូរទស្សន៍ និង កម្មវិធី ក៏ហាក់ដាច់ខ្សែរយៈ ហើយគេក៏រកលោកមិនឃើញ។ តែថ្មីៗនេះ លោកចាប់ផ្តើមលេង Tik Tok ទើបគេដឹងថា លោកនៅមិនទាន់ឈប់ពីអាជីពសិល្បៈនៅឡើយទេ»៕
