ក្រោយពីការប្រកួតយ៉ាងស្វិតស្វាញ និង ចូលរួមសុទ្ធសឹងតែបេក្ខភាពជើងខ្លាំងហើយនោះ ទីបំផុតកម្មវិធី Miss Cosmo Cambodia 2025 បានរកឃើញបវរកញ្ញាឯកតំណាងឱ្យកម្ពុជាទៅប្រកួតលើឆាកអន្តរជាតិហើយ ដោយតំណែង Miss Cosmo Cambodia 2025 បានទៅលើ កញ្ញា អ៊ិន ស្រីពី ខណៈតំណែងបវរកញ្ញាឯករងបានទៅលើ កញ្ញា ប៊ី សុធារី។
ក្នុងនោះ ខណៈមានការអបអរសាទរដល់បវរកញ្ញាម្ចាស់មកុដ Miss Cosmo Cambodia 2025 ផន ស្រីពី ហើយនោះ អ្នកគាំទ្រវិស័យបវរកញ្ញា ក៏បានចូលរួមអបអរដល់បវរកញ្ញាឯករង ប៊ី សុធារី និង សោកស្តាយដូចគ្នាដែរ ដោយ ប៊ី សុធារី មិនអាចដណ្តើមមកុដបាននៃការប្រកួតលើកចុងក្រោយលើវិស័យបវរកញ្ញារបស់នាង។
យ៉ាងណាមិញ ក្រោយទទួលបានតំណែងបវរកញ្ញាឯករង Miss Cosmo Cambodia 2025 កញ្ញា ប៊ី សុធារី ក៏បានចេញមកបង្ហោះសំណេរជាភាសាអង់គ្លេសយ៉ាងមានន័យសម្រាប់នាង និង អ្នកគាំទ្រ ជាពិសេស សំណេរនោះ ជាសារសំឡេងនៃការលើកទឹកចិត្តទៅដល់នារីគ្រប់រូប ដែលមានក្តីស្រមៃក្នុងដំណើរនៃវិស័យបវរកញ្ញាថែមទៀតផង។
កញ្ញា ប៊ី សុធារី លំដាប់រងទៅ ១ នៃ Miss Cosmo Cambodia 2025 បានរៀបរាប់មានអត្ថន័យថា៖ «ឥទ្ធិពលនៃភាពវិជ្ជមាន កំណត់ថាយើងជានរណា ហើយយើងនឹងក្លាយជានរណា។ ពួកគេ គឺជាអ្នកណែនាំ ដែលណែនាំ និង ជាគំរូបង្ហាញយើងពីអ្វី ដែលយើងអាចធ្វើទៅបាន។ ខ្ញុំកំពុងឈរនៅទីនេះ បង្ហាញអ្នកថា ខ្ញុំជានិមិត្តរូបនៃក្តីសង្ឃឹម និង លទ្ធផល។ ខ្ញុំសង្ឃឹមថា អ្នកអាចមើលឃើញខ្ញុំ គឺជាការឆ្លុះបញ្ចាំងទៅកាន់អ្នកនៅពេលណាដែលអ្នក ចង់បោះបង់ខ្លួនឯង ឬក្តីសុបិនរបស់អ្នក។
ខ្ញុំសង្ឃឹមថា ដំណើរចុងក្រោយនៅក្នុងកម្មវិធី Beauty Pageantry របស់ខ្ញុំ នឹងត្រូវបានបំផុសគំនិត និង ផ្តល់កម្លាំងចិត្តដល់នារីទាំងអស់ ដែលមានក្តីស្រមៃចង់ក្លាយជា Beauty Queen ដូចខ្ញុំ សូមជឿជាក់លើខ្លួនឯង ទោះបីជាវាលំបាកយ៉ាងណាក៏ដោយ។ បន្តចាប់ក្តីសុបិនរបស់អ្នក ហើយកុំបណ្តោយឱ្យបរាជ័យមករារាំងអ្នកឡើយ ព្រោះខ្ញុំជឿជាក់យ៉ាងពិតប្រាកដថា ថ្ងៃណាមួយអ្នកនឹងត្រូវបានគេទទួលស្គាល់ សំឡេងរបស់អ្នក នឹងត្រូវបានគេឮ ហើយគ្រប់ទិដ្ឋភាពទាំងអស់នោះ វានឹងមានឥទ្ធិពលពិតប្រាកដដល់ភាពស្រស់ស្អាតរបស់អ្នក។ ពីនាងខ្ញុំបវរកញ្ញាឯករង Miss Cosmo Cambodia 2025 អរគុណច្រើន ចេញពីបេះដូង»៕
