បរាជ័យច្រើនដង! លើកនេះ ប៊ុត សីហា ចាប់ដៃរៀមច្បង ហេង ប៊ុនលាភ ផលិតចម្រៀងរួមគ្នា ត្រៀមស្ដារប្រជាប្រិយភាព

ថ្មីៗនេះ ស្របពេលម្ចាស់ពាន The Voice Cambodia រដូវកាលទី ១ លោក ប៊ុត សីហា វិលមកកាន់វិស័យចម្រៀងជាថ្មី អ្វីកំពុងធ្វើឱ្យមហាជនអ្នកគាំទ្រផ្ទុះចាប់អារម្មណ៍ខ្លាំង ខណៈបានដឹងថាលោកកំពុងត្រៀមចេញបទចម្រៀងថ្មីៗ ជាពិសេសទទួលបានឱកាសចាប់ដៃចេញចម្រៀងរួមគ្នាជាមួយរៀមច្បងល្បីឈ្មោះ គឺលោក ហេង ប៊ុនលាភ ទៀតផង។

យ៉ាងណាមិញ ក្រឡេកទៅមើលតារាចម្រៀងរៀមច្បងលោក ហេង ប៊ុនលាភ វិញ ស្របពេលត្រៀមបង្ហាញស្នាដៃរួមគ្នាជាមួយលោក ប៊ុត សីហា នេះដែរ ក៏បានឃើញរៀមច្បងរូបនេះ ចែករំលែកលើហ្វេសប៊ុកដោយបង្ហាញក្ដីរំពឹងថានឹងទទួលបានការគាំទ្រ និង លើកទឹកចិត្តពីមហាជនចំពោះស្នាដៃថ្មីរបស់លោក។ ក្នុងនោះ លោក ហេង ប៊ុនលាភ បានរៀបរាប់ថា ៖ «សង្ឃឹមថាបងប្អូននៅមានការជួយគាំទ្រ លើកទឹកចិត្ត..ព្រោះពួកយើងចង់ល្បីដែរ»។

ក្រោយទទួលដំណឹងនេះ មហាជនអ្នកគាំទ្ររបស់តារាចម្រៀងទាំង ២ រូប ក៏បានចែករំលែកភ្ជាប់ជាមួយមតិបង្ហាញការគាំទ្រ ដែលរង’ចាំមើលស្នាដៃថ្មីរួមគ្នាជាលើកដំបូងរបស់អ្នកទាំងពីរ៕