ថ្មីៗនេះ មានរឿងរ៉ាវដ៏គួរឱ្យហួសចិត្តអស់សំណើចមួយនៅប្រទេសចិន ដែលមានបុរស ៣ នាក់ បានទៅផឹកស៊ីជាមួយគ្នា ដល់មកវិញស្រវឹងគ្មានអ្នកណាហ៊ានបើកឡាន និង នឹកឃើញគោរពច្បាប់ចរាចរណ៍ផង លេងនាំគ្នាចុះរុញតាមផ្លូវតែម្តង។
រឿងរ៉ាវមួយនេះ បានធ្វើឱ្យមានការផ្ទុះវែកញែកណាស់នៅតាមបណ្តាញសង្គមចិន ដោយអ្នកខ្លះសរសើថាបុរសទាំងនេះចេះគោរពច្បាប់ចរាចរណ៍ រីឯអ្នកខ្លះទៀតគិតថាការរុញបែបនេះគឺអាចចាត់ទុកថាជាការបើកបរឡានដដែល។ ដោយឡែក ខាងប៉ូលិសពាក់ព័ន្ធបានពិនិត្យមើលនៅក្នុងកាមេរ៉ាសុវត្ថិភាព បានឃើញថាបុរសទាំង ៣ នាក់នេះ បាននាំគ្នារុញឡានអស់ប្រហែលជា ៥០០ ម៉ែត្រ ដោយមានម្នាក់ជាអ្នកកាន់ចង្កូតឡានពីក្រៅ រីឯ ២ នាក់ទៀតជាអ្នករុញពីក្រោយ។ បុរសទាំង ៣ នាក់នេះ មានស្មារតីនឹកឃើញដល់ការគោរពច្បាប់ចរាចរណ៍ ទើបរកនឹកវិធីបែបនេះ ហើយពិតណាស់វាមិនមែនជាការបើកបរខណៈស្រវឹងឡើយ។
យ៉ាងណាមិញ ប៉ូលិសបានឱ្យដឹងថា បើនៅក្រោមច្បាប់សុវត្ថិភាពចរាចរណ៍របស់ប្រទេសចិន បុគ្គលមិនអាចប្រើប្រាស់ផ្លូវថ្នល់ដើម្បីធ្វើសកម្មភាពណាមួយក្រៅពីការបើកបរបានឡើយ ដូច្នេះហើយករណីនេះគឺអាចខុសច្បាប់ ព្រោះប៉ះពាល់ដល់ចរាចរណ៍របស់យានជំនិះផ្សេងៗ និង អាចមានគ្រោះថ្នាក់ដល់ខ្លួនឯងទៀត៕
ប្រភព៖ Khaosod
