ថ្មីៗនេះ អ្នកលេងបណ្តាញសង្គមហ្វេសប៊ុក កំពុងតែផ្ទុះការចាប់អារម្មណ៍ និង បញ្ចេញមតិវែកញែកព្រោងព្រាតបន្ទាប់ពីបទថ្មីរបស់តារាចម្រៀងរ៉េប All3rgy សមាជិកក្រុម La Cima Cartel ចំណងជើង «Flash Back» បានចេញជាផ្លូវការកាលពីថ្ងៃទី ១១ ខែតុលា ឆ្នាំ ២០២៥ កន្លងទៅ។
ចម្រៀង «Flash Back» របស់ All3rgy នេះដែរ បានសរសេររៀបរាប់ត្រឡប់ទៅក្រោយ រំឭកពីដំណើរជីវិតក្នុងវិថីសិល្បៈក្នុងការចាប់ផ្តើម និង បុគ្គល ដែលបានរួមដំណើរជាមួយលោកតាំងពីជំហានដំបូង ដោយមានលោក ស៊ីវ រិទ្ធី, លោក សង្ហា និង សមាជិក La Cima Cartel ជាដើម។
ដោយឡែក អ្វីដែលធ្វើឱ្យបទចម្រៀងខាងលើផ្ទុះការវែកញែកខ្លាំងនោះ ខណៈមានអ្នកចូលទៅបញ្ចេញមតិលើកយកពីតារាចម្រៀងរ៉េប វណ្ណដា មក ព្រមទាំងមានអ្នកលើកពាក្យថា «ផឹកទឹកកុំភ្លេចប្រភព» មកទៀតផង។
ភ្លាមនោះដែរ គេបានឃើញតារាចម្រៀងរ៉េប All3rgy មិនបង្អង់ ក៏បានចូលទៅបញ្ចេញក្រោមចម្រៀងរបស់លោក ដោយលោកបានសរសេរថា៖ «វណ្ណដា ជួយខ្ញុំ ឬ ខ្ញុំជួយ វណ្ណដា?»។ លើសពីនោះ លោកក៏បានឆ្លើយតបនឹងពាក្យ «ផឹកទឹកកុំភ្លេចប្រភព» ថា ៖ «ពាក្យថា «ផឹកទឹកកុំភ្លេចប្រភព មិនសមនឹងខ្ញុំទេ សូមជ្រាប»៕
