បន្ទាប់ពីចេញទៅបំពេញបេសកកម្មលើឆាកអន្តរជាតិ Miss & Mister Supranational 2025 ជាង ២ សប្ដាហ៍ នៅប្រទេសប៉ូឡូញ មកដល់ពេលនេះ បវរកញ្ញា ឈុំ ចាន់ដារ៉ា និង បុរសឯក ហៀប សាងហ៊ុយ បានបញ្ចប់បេសកកម្មរបស់ខ្លូនដោយរលូន ខណៈកម្មវិធីបានប្រកួតវគ្កផ្ដាច់ព្រ័ត្រ និង រកឃើញម្ចាស់រាជិនីមកុដ និង តំណែងបុរសឯកប្រចាំឆ្នាំ ២០២៥ ដ៏ស័ក្តិសមហើយ។
ក្នុងដំណើរការប្រកួតវគ្គផ្ដាច់ព្រ័ត្រថ្មីៗកន្លងទៅនេះ ចំពោះបវរកញ្ញា និង បុរសឯកកម្ពុជាយើង គឺកញ្ញា ឈុំ ចាន់ដារ៉ា និង លោក ហៀប សាងហ៊ុយ បានធ្វើឱ្យមហាជនមានការសោកស្ដាយជាខ្លាំង ដែលអ្នកទាំងពីរពុំមានឱកាសអាចបើកទ្វារកម្ពុជាឈានចូល Top ណាមួយក្នុងកម្មវិធីអន្តរជាតិ Supranational 2025 នេះឡើយ។
ដ្បិតតែមិនអាចនាំយកលទ្ធផលល្អមកកាន់មាតុភូមិវិញ ប៉ុន្តែបវរកញ្ញា និង បុរសឯកទាំងពីរូបនេះ ក៏ទទួលបានការអបអរលើកទឹកចិត្តពីមហាជនអ្នកគាំទ្រកម្ពុជាជាច្រើន ដែលមានមោទកភាពចំពោះអ្នកទាំងពីរ សម្រាប់ការតំណាងកម្ពុជាដ៏មោះមុត និង ធ្វើបានយ៉ាងអស្ចារ្យសម្រាប់កម្ពុជាលើឆាកអន្តរជាតិមួយនេះ។
យ៉ាងណាមិញ ក្រឡេកមើលហ្វេសប៊ុករបស់កញ្ញា ឈុំ ចាន់ដារ៉ា និង លោក ហៀប សាងហ៊ុយ ក្រោយពីបានបញ្ចប់ការប្រកួតនេះដែរ អ្នកទាំងពីរក៏បានបង្ហោះសារបង្ហាញនូវអារម្មណ៍ស្ដាយ និង សុំទោសដល់អ្នកគាំទ្រកម្ពុជាចំពោះលទ្ធផលនៃការប្រកួតផងដែរ។ ក្នុងនោះ កញ្ញា ឈុំ ចាន់ដារ៉ា បានបង្ហោះរៀបរាប់ថា «I am deeply sorry everyone» រីឯលោក ហៀប សាងហ៊ុយ ក៏បានបង្ហោះសារលើហ្វេសប៊ុកដែរថា ៖ « My mission completed បេសកកម្មត្រូវបានបញ្ចប់ អរគុណសម្រាប់ការគាំទ្រ និង កម្លាំងចិត្តពីអ្នកទាំងអស់គ្នា រាត្រីសួរស្ដី ប្រជាជនកម្ពុជា»៕
