បង្ហាញមុខអាកាសយានិកកម្ពុជា ៣ រូប មានប្រវត្តិសិក្សាខ្ពស់ កំពុងបម្រើការក្នុងក្រុមហ៊ុនអាកាសចរណ៍ល្បីៗនៅកម្ពុជា

អាកាសយានិក អាចថាជាអាជីពមួយដែលខ្ពង់ខ្ពស់ ទាមទារសមត្ថភាពខ្លាំង ហើយក៏តម្រូវចំណាយច្រើនលើការសិក្សា។ តែយ៉ាងណាមិញ កូនខ្មែរមួយចំនួន ដែលមានមហិច្ឆតាលើជំនាញនេះ នៅតែអាចឈោងចាប់វាបាន ដែលបានក្លាយជាធនធានដ៏សំខាន់ អភិវឌ្ឍន៍វិស័យអាកាសចរណ៍នៅកម្ពុជា។ យើងសូមលើកពីអាកាសយានិក ៣ រូប ដែលពួកគេសុទ្ធតែក្មេងវ័យ ការសិក្សាខ្ពង់ខ្ពស់ បច្ចុប្បន្នកំពុងបម្រើការនៅក្នុងក្រុមហ៊ុនអាកាសចរណ៍ល្បីៗនៅកម្ពុជា។

១. អាកាសយានិក លឹម រាជ្ជត្តា

អាកាសយានិក លឹម រាជ្ជត្តា មានវ័យប្រហែល ២៥ ឆ្នាំ។ ចាប់ពីខែ មករា ឆ្នាំ ២០២០ ដល់ខែ មីនា ឆ្នាំ ២០២៥  លោកបានចូលបម្រើការងារក្នុងតំណែងជាមន្ត្រី First Officer នៅក្រុមហ៊ុនអាកាសចរណ៍ Cambodia Angkor Air។ ហើយចាប់ពីខែ មីនា មក លោកបានផ្លាស់ប្តូរទៅបម្រើការងារនៅក្រុមហ៊ុនអាកាសចរណ៍ដ៏ល្បី AirAsia Cambodia។ លោកបានបញ្ចប់​ការសិក្សា​ជំនាញ​បើកបរ​យន្តហោះ នៅសា​លា​អាកាសចរណ៍​ ​Epic​ ​Flight​ ​Academy​ ​នៅ​រដ្ឋ​ផ្លរីដា​ ​សហរដ្ឋអាមេរិក។

២. អាកាសយានិក លីម ជុងយី

វ័យទើបតែជាងម្ភៃឆ្នាំ  លីម ជុងយី គឺជាអាកាសយានិកកំពុងបម្រើការងារនៅក្នុងក្រុមហ៊ុន អាកាសចរណ៍ជាតិកម្ពុជា អង្គរអ៊ែរ (Cambodia Angkor Air)។ លោកបានចាប់ផ្តើមការងារហោះហើរចាប់តាំងពីឆ្នាំ២០២០ មក ដោយកាន់យន្តហោះប្រភេទ A320 និង បានបញ្ជាហោះហើរទៅកាន់​ប្រទេសផ្សេងៗ​ដូចជា វៀតណាម កូរ៉េ ចិន ឥណ្ឌា ចិន និង ឌូបៃជាដើម។ ចំពោះចំណេះដឹងហោះហើរ លោកបានសិក្សានៅ​ប្រទេសវៀតណាមរយៈពេល ៧ ខែទៅលើទ្រឹស្តីនៅ សាលា Viet Flight Training បន្ទាប់មកបន្តទៅសហរដ្ឋអាមេរិក អនុវត្តលើការបើកបរយន្តហោះខ្នាតតូចរយៈពេល ១ ឆ្នាំនៅមហាវិទ្យាល័យ Aviator College។ ​

៣. អាកាសយានិក ប៊ុត ឃុនម៉ានិត

តាមរយៈគណនី LinkedIn បច្ចុប្បន្ន អាកាសយានិក ប៊ុត ឃុនម៉ានិត កំពុងបម្រើការងារតំណែង First Officer និង ជាអ្នកគ្រប់គ្រងទំនាក់ទំនងរដ្ឋបាល នៅក្រុមហ៊ុនអាកាសចរណ៍ AirAsia Cambodia ដែលចូលបម្រើការកាលពីខែ តុលា ឆ្នាំ ២០២៣ មក។ មុនផ្លាស់ប្តូរមកក្រុមហ៊ុននេះ លោកបានធ្វើការនៅក្រុមហ៊ុនអាកាសចរណ៍ Cambodia Angkor Air បានរយៈពេលជិត ៥ ឆ្នាំផងដែរ។ ចំពោះការសិក្សា នៅឆ្នាំ ២០១៣ លោកបានបញ្ចប់បរិញ្ញាបត្រវិទ្យាសាស្ត្រ ផ្នែកគ្រប់គ្រង និង គ្រប់គ្រងពាណិជ្ជកម្ម នៅសាកលវិទ្យាល័យ California State University San Marcos, ឆ្នាំ ២០១៥ បញ្ចប់អនុបណ្ឌិតវិទ្យាសាស្ត្រអាកាសចរណ៍ ខាងអាកាសចរណ៍ និង គ្រប់គ្រងលំហអាកាស នៅសាកលវិទ្យាល័យ Embry-Riddle Aeronautical University នៅរដ្ឋផ្លរីដា សហរដ្ឋអាមេរិក, ឆ្នាំ ២០១៨ ទទួលសញ្ញាបត្រអាកាសចរណ៍ខាង អាកាសចរណ៍ ពាណិជ្ជកម្ម និង អ្នកបើកយន្តហោះអាជីព នៅសាលា Australian Airline Pilot Academy, និង ឆ្នាំ ២០១៩ បានបញ្ចប់វគ្គសិក្សា Airbus A320 Type Rating នៅមជ្ឈមណ្ឌល Airbus Jakarta Training Center៕​