ខណៈពិធីបូជាសព របស់តារាចម្រៀងរ៉េប RuthKo បានរៀបចំរួចរាល់បន្សល់ទុកនូវភាពអាឡោះអាល័យដល់ក្រុមគ្រួសារ មិត្តភក្តិ និង អ្នកគាំទ្រហើយនោះ ពិធីបុណ្យ ៧ ថ្ងៃរបស់លោក នឹងរៀបចំនៅថ្ងៃទី ១២ ខែមករា ឆ្នាំ ២០២៥ ខាងមុខនេះហើយ។
ដោយឡែក ក្រោយពិធីបូជាសពបានបញ្ចប់រួចរាល់ស្រាប់តែនៅថ្ងៃទី ០៩ ខែមករា ឆ្នាំ ២០២៥ កន្លងទៅនេះ បងស្រីបង្កើតរបស់លោក RuthKo បានបង្ហោះសារបង្ហាញអារម្មណ៍ក្តៅឆួលនឹងនារីម្នាក់ ដែលបានបង្ហោះសារ និង ខមមិនចង់សំដៅដល់លោក RuthKo ខណៈក្រុមគ្រួសាររបស់នាងកំពុងកាន់ទុក្ខ ដោយនារីរូបនោះបានសរសេរថា ៖ «បើសិនបង ឬប្អូនខ្ញុំទៅញ៉ែគេដែរ ខ្ញុំមិនហ៊ានផុសដូចគាត់ទេ ការផុសរបស់គាត់ គឺមិនឱ្យតម្លៃទៅខាងស្រីបន្តិចសោះ ទាំងដែលគាត់ជាមនុស្សស្រីដែរ»។ លើសពីនេះ នារីរូបនោះថែមទាំងបានខំមិនថា ៖ «បងស្រីគាត់ និយាយមកបែបប្អូនគាត់ស្រោបមាស»។
ភ្លាមៗ បងស្រីរបស់លោក RuthKo បានបង្ហោះឆ្លើយតបទៅខមមិន និង Status របស់នារីរូបនោះវិញថា៖ «ចាសបង! ខ្ញុំសូមអភ័យទោសបើសិនក្តីស្រលាញ់របស់ខ្ញុំ ដែលខ្ញុំមានសម្រាប់ប្អូនខ្ញុំធ្វើឱ្យបងមួម៉ៅក្តៅក្រហាយ។ ធ្វើម៉េចទេបង បើជាសាច់ជាឈាមរបស់ខ្ញុំ។ ពេលឃើញគេបំផ្លាញឈ្មោះប្អូនខ្ញុំ យកខ្មោចប្អូនខ្ញុំធ្វើអាជីវកម្ម ដើម្បីតែ attention និង ប្រយោជន៍ផ្ទាល់ខ្លួនទាំងដែលរឿងនោះមិនពិត ហើយថែមទាំងយកម្តាយខ្ញុំមកប្រឡូកប្រឡាក់ទៀតនោះ ទាំងដែលគ្រួសារខ្ញុំត្រូវស្ពាយទម្ងន់ទុក្ខនេះអស់មួយជីវិត ខ្ញុំជាបងមិនអាចឱបដៃឈរមើលបានទេបង។ ក្រុមគ្រួសារខ្ញុំក៏មានកិត្តិយស និង សេចក្តីថ្លៃថ្នូរ ដែលត្រូវរក្សាដែរណាបង។ ខ្ញុំសូមជូនពរ បង និង គ្រួសារបងឱ្យមានជីវិតអមតៈរហូតទៅ កុំឱ្យបងជួបរឿងសោកនាដកម្មដូចគ្រួសារខ្ញុំ។ កុំឱ្យមានអ្នកណាម្នាក់បំផ្លាញកិត្តិយសគ្រួសារបង ដូចដែលគេធ្វើមកលើគ្រួសារខ្ញុំ។ ខ្ញុំសូមទុករឿងនេះឱ្យមហាជនជាអ្នកវិនិច្ឆ័យ ថាបងជាមនុស្សបែបណា»។
គួររំឭកថា Status និង ខមមិន ដែលនារីរូបនោះបានបង្ហោះឡើង ធ្វើឱ្យបងស្រី RuthKo មិនអាចនៅស្ងៀមបាននោះ ក៏ព្រោះតែអំឡុងពេលលោក RuthKo ទទួលមរណភាពភ្លាមៗមាន នារីប៉ុន្មានរូប ចេញមុខមកបង្ហាញដូចជាគូស្នេហ៍របស់លោក RuthKo និង បង្កឱ្យមានផលប៉ះពាល់អារម្មណ៍ដល់ក្រុមគ្រួសារនៃសព។ ពេលនោះដែរ បងស្រីរបស់លោក RuthKo ក៏ចេញមកបង្ហោះសារ សុំបញ្ឈប់ការបង្ហោះពាក់ព័ន្ធពីប្អូនប្រុស ជាពិសេស បានបញ្ជាក់ថា ប្អូនប្រុសមិនមានជាប់ជំពាក់វាក់វិននឹងនារីណាម្នាក់ឡើយ៕
