មានរបរផ្ទាល់ខ្លួន គ្មានប្រាក់ខែ ក៏អាចធ្វើ ប.ស.ស បានដែរ តែត្រូវមានឯកសារ ៣ មុខ និង ត្រូវបង់ប្រចាំខែបែបនេះ

នាពេលថ្មីៗនេះ បេឡាជាតិសន្តិសុខសង្គម បានចែករំលែកពីចំណេះដឹងពីការចុះបញ្ជីសម្រាប់បុគ្គលស្វ័យនិយោជន៍ និង អ្នកនៅក្នុងបន្ទុកសមាជិក ប.ស.ស. ដែលសាមីខ្លួនអាចទៅកាន់ទីស្នាក់ការ ប.ស.ស. នៅជិតដើម្បីធ្វើដោយផ្ទាល់ ឬ តាមរយៈកម្មវិធីទូរស័ព្ទដៃ NSSF Member App។

ចំពោះការធ្វើនេះទៀតសោត សម្រាប់បុគ្គលស្វ័យនិយោជន៍ សំដៅទៅដល់បុគ្គលដែលមានប្រកបមុខរបររកចំណូលផ្ទាល់ខ្លួន ដោយមិនពាក់ព័ន្ធនឹងប្រាក់ឈ្នួល ឬ ប្រាក់បៀវត្ស និង មិនមានប្រើប្រាស់បុគ្គលិកនៅក្នុងសកម្មភាពមុខរបររបស់ខ្លួន ព្រមទាំងមានអាយុមិនលើសពី ៦០ ឆ្នាំ គិតត្រឹមកាលបរិច្ឆេទចុះបញ្ជី គឺត្រូវមានឯកសារភ្ជាប់រួមមាន ៖

– កាត ប.ស.ស. (ប្រសិនបើធ្លាប់មាន)

– មានអត្តសញ្ញាណប័ណ្ណសញ្ជាតិខ្មែរច្បាប់ដើម (មានសុពលភាព)

– វិញ្ញាបនបត្រចុះឈ្មោះអ្នកសេដ្ឋកិច្ចក្រៅប្រព័ន្ធ ចេញដោយគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ។

ចំពោះការបង់ភាគទាន គឺភាគទានប្រចាំខែ ១៥ ៦០០ រៀល/ម្នាក់ ដែលសាម៉ីខ្លួនអាចប្រកាសបង់ជាប្រចាំខែ ឬ ប្រចាំឆ្នាំក៏បាន តាមការស្នើសុំពេលចុះបញ្ជីដំបូង។ ព័ត៌មានបន្ថែមអាចទំនាក់ទំនងទៅកាន់លេខ ១២៨៦ ឬ លេខ ១២៩៧ ក្រុមការងារនឹងធ្វើការពន្យល់លម្អិតជូន៕

ប្រភព ៖ បេឡាជាតិសន្តិសុខសង្គម