មានហេតុការណ៍ដ៏គួរឱ្យរន្ធត់មួយបានកើតឡើងនៅខេត្ត Kalimantan ប្រទសឥណ្ឌូនេស៊ី ដែលស្រ្តីមានផ្ទៃពោះ ៨ ខែ វ័យ ២៨ ឆ្នាំម្នាក់ ត្រូវបានក្រពើឡើងពីទឹកមកអូសទៅស៊ីយ៉ាងស្រស់ៗ ខណៈនាងកំពុងអង្គុយធ្វើម្ហូបនៅក្នុងផ្ទះ។
តាមព័ត៌មានបានឱ្យដឹងថា ស្រ្តីរងគ្រោះមានឈ្មោះថា Munira ហើយផ្ទះរបស់នាងស្ថិតនៅជាប់មាត់ទន្លេ Mamburu ដែលកំពុងតែជន់លិចដោយសារភ្លៀងធ្លាក់ខ្លាំង។ នៅថ្ងៃទី ៣១ ខែឧសភា ឆ្នាំ ២០២៥ ដែលជាថ្ងៃកើតហេតុ នាងកំពុងតែអង្គុយធ្វើម្ហូបថ្ងៃត្រង់នៅក្នុងផ្ទះបាយ ដែលមានទឹកលិចចូលទៅដល់ តែខណៈកំពុងអង្គុយធ្វើសុខៗ ស្រាប់តែមានក្រពើមួយក្បាលស្ទុះមកខាំជើងរបស់នាង រួចទាញនាងឱ្យផ្ងាក្រោយដោយក្តីរន្ធត់។
នាងបានព្យាយាមស្រែកឱ្យគេជួយដោយការតក់ស្លុត ហើយខណៈនោះបងស្រីរបស់នាងក៏បានស្ទុះមកជួយ ដោយបានរត់ទៅរកអាវុធដើម្បីមកតស៊ូជាមួយក្រពើនេះ តែជាអកុសលពេលត្រឡប់មកវិញ ប្អូនស្រីរបស់នាងក៏ត្រូវបានក្រពើអូសទៅក្នុងទឹកបាត់ទៅហើយ។ យ៉ាងណាមិញ អ្នកស្រុកក៏បានព្យាយាមជួយរក ហើយកន្លះម៉ោងក្រោយមក គេក៏ឃើញសាកសពរបស់ Munira អណ្តែតឡើងមកលើទឹក ដោយបាត់បង់ជីវិតទាំងម្តាយ និង កូនទៅហើយ៕
ប្រភព៖ Sanook
