ជារឿងសឹងតែមិនគួរឱ្យជឿ តែវាបានកើតឡើងពិតមែន ដែលម្ចាស់ហាងអាហារមួយកន្លែងនៅក្នុងរដ្ឋ Illinois សហរដ្ឋអាមេរិក ត្រូវបានគេថតបានពេលកំពុងដេញតាមភ្ញៀវម្នាក់ដែលបង់លុយតែថ្លៃម្ហូប ២០ ដុល្លារ ដោយមិនបានថែមលុយធីប។ នេះបើតាមការចេញផ្សាយរបស់សារព័ត៌មាន CBS NEW CHIGAGO។
រឿងនេះបានកើតឡើងនៅហាងអាហារឈ្មោះ Table to Stix ស្ថិតនៅចំកណ្តាលទីក្រុង Evanston កាលពីថ្ងៃសៅរ៍ ទី ១៩ ខែមេសា ដោយម្ចាស់ហាង លោក Kenny Chou បានប្រញាប់ដេញតាមអតិថិជនម្នាក់ ដែលបានដាក់លុយ ២០ ដុល្លារ លើវិក្កយបត្រអាហារអស់តែ $19.89។
នៅក្នុងវីដេអូ ខណៈម្ចាស់ហាងកំពុងដេញតាម អតិថិជនបានសួរហេតុអ្វីបានជាដេញតាមរូបគេ ទាំងដែលគេបានបង់លុយរួច។ ចម្លើយដ៏ហួសចិត្ត គឺម្ចាស់ហាងរំពឹងបានលុយ ១៨ % ទៀតនៃថ្លៃចំណាយក្នុងវិក្កយបត្រ ដើម្បីជាលុយធីប។ ភ្លាមនោះអតិថិជនតបវិញថា ៖ «ខ្ញុំបានបង់ប្រាក់សម្រាប់អាហាររបស់ខ្ញុំរួចរាល់។ ខ្ញុំបានប្រគល់ឱ្យអ្នក ២០ ដុល្លារ អ្នកមិនអាចគិតប្រាក់លើសពីអ្វីដែលបានបង់នោះទេ»។
ម្ចាស់ហាងនៅតែមិនសុខចិត្ត ដោយបានជេរប្រមាថ ហើយគំរាមទះកំផ្លៀងទៀត បើអតិថិជនមិនព្រមឱ្យលុយថែម។ ហាងអាហារ Table to Stix ខាងលើ មានភាពល្បីល្បាញខ្លាំង មានអ្នក review វិជ្ជមានទាំងរសជាតិ និង សេវាកម្ម ប៉ុន្តែក្រោយវីដេអូនេះផ្ទុះ មានអ្នកទស្សនាខ្ទង់លាននាក់នៅលើបណ្តាញសង្គម X និង Instagram ហាងនេះបានបាត់បង់ភ្ញៀវទាំងស្រុង ជាពិសេសការមើលងាយ ឬប្រឆាំងនឹងជនជាតិស្បែកខ្មៅ។
នៅទីបំផុត ម្ចាស់ហាងបានចេញមុខសុំទោសចំពោះអាកប្បកិរិយាមិនសមរម្យ ដោយសារតែកំហឹង ធ្វើឱ្យលោកគ្រប់គ្រងអារម្មណ៍មិនបាន ប៉ះពាល់ដល់អាជីវកម្មទាំងមូល។ ម្ចាស់ហាងក៏បានព្យាយាមកែប្រែ ដោយផ្ញើអាហារដែលជាចំណូលចិត្តរបស់បុរសអតិថិជននោះ ទៅកាន់រូបគេដោយឥតគិតថ្លៃ រួមជាមួយការសរសេរសំបុត្រសុំទោសផងដែរ៕
