នៅព្រឹកថ្ងៃទី ២២ ខែតុលា ឆ្នាំ ២០២៥ នេះ ទូរទស្សន៍ជាតិកម្ពុជា បានបញ្ជាក់ឱ្យបានដឹងថា នៅខេត្តស្ទឹងត្រែង មានបុរសម្នាក់ឈ្មោះ ជាប ចាប រស់នៅក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ជាប្រជាពលរដ្ឋដ៏មានមនសិការ បានបង្ហាញនូវទឹកចិត្តស្រឡាញ់ជាតិដ៏ប្រពៃ តាមរយៈការនាំយកនូវវត្ថុបុរាណដ៏មានតម្លៃចំនួន ០២ មុខ គឺ «តុម្ព» និង «កង» មកប្រគល់ជូនអាជ្ញាធរខេត្ត។
តាមប្រភពបានឱ្យដឹងថា វត្ថុបុរាណទាំងនេះ ត្រូវបានលោក ជាប ចាប ប្រទះឃើញដោយចៃដន្យ តាំងពីអំឡុងឆ្នាំ ២០១៩ មកម្ល៉េះ នៅលើដីចំការរបស់លោក ស្ថិតក្នុងភូមិអូរពងមាន់២ សង្កាត់ស្ទឹងត្រែង ក្រុងស្ទឹងត្រែង។ ក្រោយពីបានរក្សាទុកអស់ជាច្រើនឆ្នាំ លោកបានសម្រេចចិត្តដ៏ត្រឹមត្រូវបំផុត ក្នុងការប្រគល់វត្ថុដ៏កម្រទាំងនេះ ជូនទៅអាជ្ញាធរ ដើម្បីធានាបាននូវការថែរក្សាបានគង់វង្ស។
បច្ចុប្បន្ន វត្ថុបុរាណទាំង ០២ នេះ ត្រូវបានប្រគល់ជូនបន្តទៅលោកស្រីប្រធានមន្ទីរវប្បធម៌ និង វិចិត្រសិល្បៈខេត្ត ដើម្បីយកទៅរក្សាទុកយ៉ាងយកចិត្តទុកដាក់បំផុត។ មន្ត្រីជំនាញ នឹងធ្វើការសិក្សាស្រាវជ្រាវយ៉ាងលម្អិតបន្ថែមលើប្រភេទ លក្ខណៈ និង អាយុកាល នៃវត្ថុបុរាណទាំងនេះ មុននឹងចាត់ទុកជាសម្បត្តិមរតកវប្បធម៌ជាតិដ៏ពិសិដ្ឋរបស់កម្ពុជា៕
