នៅព្រឹកថ្ងៃទី ១៩ ខែមីនា ឆ្នាំ ២០២៥ នេះ ឯកឧត្តមបណ្ឌិត ម៉ុង ឬទ្ធី បានសម្ដែងការសោកស្ដាយចំពោះការលាចាកសិក្ខាបទ ព្រះតេជគុណ ជួន កក្កដា ព្រះវិន័យធរគណខេត្តតាកែវ និង ជាព្រឹទ្ធបុរសរងនៃពុទ្ធិកសកលវិទ្យាល័យព្រះសីហនុរាជ នាយកសាលាពុទ្ធិកនាងខ្មៅ ដែលបានបួសក្នុងវិស័យព្រះពុទ្ធសាសនា ជាង ២៧ ព្រះវស្សា និង សម្រេចលាចាកសិក្ខាបទនៅព្រឹកថ្ងៃទី ១៩ ខែមីនា ឆ្នាំ ២០២៥ នេះ។
ក្នុងនោះ បើតាមការបង្ហោះពីគណនី ឯកឧត្តមបណ្ឌិត ម៉ុង ឬទ្ធី នៅព្រឹកថ្ងៃទី ១៩ ខែមីនា ឆ្នាំ ២០២៥ នេះ បានបញ្ជាក់ឱ្យបានដឹងថា នៅយប់មុនថ្ងៃលាចាកសិក្ខាបទ ព្រះអង្គ បានទូរស័ព្ទទៅកាន់ឯកឧត្តមបណ្ឌិត ម៉ុង ឬទ្ធី វេលាម៉ោង ១០៖២១ នាទី យប់ ថ្ងៃទី ១៨ ខែមីនា ឆ្នាំ ២០២៥ តែជាពេលដែលឯកឧត្តមសម្រាកក៏ពុំបានលើក ទើបព្រះតេជគុណ ជួន កក្កដា បានបន្សល់នូវសារដូចតទៅ ៖ «អាត្មាសូមអព្យាស្រ័យញោមប្រុសញោមស្រីពីចម្ងាយ ដោយមិនបានទៅជួបញោមផ្ទាល់ ហើយម្យ៉ាងខលទៅញោមក៏អត់បានលើក ចឹងអាត្មាសូមចម្រើនពរលាញោមពីចម្ងាយ ថ្ងៃស្អែកនេះអាត្មាចម្រើនពរញោម លាចាកសិក្ខាបទហើយ នៅវត្តប្រាសាទនាងខ្មៅ សូមញោមអនុគ្រោះពីចម្ងាយផង ដោយក្តីគោរពស្រលាញ់ញោម ពីអាត្មាភាព ជួន កក្កដា»។
ឯកឧត្តមបណ្ឌិត ម៉ុង ឬទ្ធី បានបញ្ជាក់ឱ្យដឹងបន្ថែមថា ៖ «ករុណាបានទូរស័ព្ទទៅវិញដែរ តែទូរស័ព្ទមិនចូលទាំង ២ ប្រព័ន្ធ ដំណឹងនេះចម្លែកខ្លាំងណាស់មិនគួរឱ្យជឿទេ បើព្រះអង្គលាចាកសិក្ខាបទពិតមែននោះ ចុះតើវាសនាអនាគតកុមារកំព្រា កូននេនតូចៗរាប់រយព្រះអង្គទៅជាយ៉ាងណា ករុណាពិតជាមានការសោកស្តាយជាខ្លាំងចំពោះដំណឹងនេះ »។
