អ្នកស្រី Lucia Silvestri ត្រូវបានគេស្គាល់ជាសកល គឺជានាយកផ្នែកច្នៃប្រឌិតនៅក្រុមហ៊ុនម៉ាកគ្រឿងអលង្ការប្រណីតលំដាប់ពិភពលោក BVLGARI។ អ្នកស្រីបានចូលធ្វើការផ្នែកត្បូងនៅ BVLGARI តាំងពីអាយុ ១៨ ឆ្នាំ អំឡុងពេលកំពុងសិក្សាផ្នែកជីវវិទ្យា។ បើគិតមកទល់ពេលបច្ចុប្បន្ន អ្នកស្រីធ្វើការឱ្យក្រុមហ៊ុននេះអស់រយៈពេលជាង ៤០ ឆ្នាំមកហើយ។
កាលពីកន្លងទៅ ជាមួយព្រឹត្តិការណ៍បង្ហាញខូឡិកហ្សិន BVLGARI នៅកម្ពុជា អ្នកស្រីក៏បានបង្ហាញវត្តមានចូលរួម ហើយថែមទាំងឆ្លៀតពេលធ្វើដំណើរកម្សាន្តនៅលើទឹកដីអង្គរផងដែរ។ ដោយជាប់ចិត្តនឹងកម្ពុជាខ្លាំង ក្រោយពេលត្រលប់ទៅបំពេញការងារវិញ អ្នកស្រីបានបង្ហោះរូបភាព និង វីដេអូជាហូរហែសុទ្ធសឹងជាដំណើរកម្សាន្ត និង អនុស្សាវរីយ៍មិនអាចបំភ្លេចបាននៅខេត្តសៀមរាប។
ជាក់ស្តែង តាមរយៈគណនី Instagram របស់អ្នកស្រី ដែលមានអ្នកតាមដានរាប់រយ K អ្នកស្រីទើបបានបង្ហោះវីដេអូ បង្ហាញពីដំណើរកម្សាន្តនៅខេត្តសៀមរាប ដោយភ្ជាប់ជាមួយសារយ៉ាងខ្លីថា៖ Cambodia, you made this February unforgettable ឬ កម្ពុជាអ្នកធ្វើឱ្យខែកុម្ភៈនេះមិនអាចបំភ្លេចបាន។ ចំណែកឯការបង្ហោះមួយទៀតជារូបភាព អ្នកស្រីបានសរសេរថា៖ Ta Prohm my favorite Temple in Siem Reap since I first came here more than 20 year ago! ឬ ប្រាសាទតាព្រហ្ម ជាប្រាសាទដែលខ្ញុំចូលចិត្តនៅក្នុងខេត្តសៀមរាប តាំងពីខ្ញុំធ្លាប់បានមកទីនេះលើកដំបូងកាលពីជាងម្ភៃឆ្នាំមុន។ ដូច្នេះ នេះគឺជាលើកទីពីរហើយដែលអ្នកស្រីមកកាន់កម្ពុជា ហើយក៏ជាកន្លែងដែលធ្វើឱ្យអ្នកស្រីតែងតែចងចាំមិនភ្លេចផងដែរ៕
