កាលពីយប់ថ្ងៃទី ០៧ ខែឧសភា ឆ្នាំ ២០២៥ កន្លងទៅនេះ មានករណីអគ្គិភ័យមួយនៅស្រុកព្រៃនប់ ខេត្តព្រះសីហនុ ដែលបង្កឡើងបន្ទាប់ពីមានការបង្ហូរសាំងដាក់ប៊ីដុងពីរថយន្តដឹកប្រេង ដោយអ្នកបើកបររថយន្តរបស់ក្រុមហ៊ុន CLEAN ENERGlES បានបង្ហូរសាំងលក់ឱ្យទៅប្រជាពលរដ្ឋ ខណៈម្ចាស់ផ្ទះកំពុងអាំងងាវហូប ក៏បង្កឱ្យមានអគ្គិភ័យកើតឡើងតែម្ដង។
តាមប្រភពព័ត៌មានបានឱ្យដឹងថា ករណីនេះខាងលើនេះបានកើតឡើងនៅវេលាម៉ោង ១១:៤០ នាទីយប់ ដោយអគ្គិភ័យបានឆេះរថយន្តដឹកប្រេងចំនួន ០១ គ្រឿង រួចបន្តឆេះរាលដាលដល់ផ្ទះប្រជាពលរដ្ឋស្ថិតនៅចំណុចភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ បណ្តាលឱ្យមនុស្ស ៣ នាក់ បានស្លាប់បាត់បង់ជីវិត និង របួសស្រាលចំនួន ១ នាក់។
ក្នុងនោះដែរ ផ្ទះប្រជាពលរដ្ឋចំនួន ០២ ខ្នង ក៏ត្រូវអគ្គិភ័យបានឆេះរាលដាលដល់អស់ទាំងស្រុង និង ម៉ូតូចំនួន ០៥ គ្រឿង ព្រមទាំងទ្រព្យសម្បត្តិមួយចំនួនធំ សរុបជាទឹកប្រាក់ចំនួន ៥ ម៉ឺនដុល្លារ។
គួរជម្រាបថា ជនរងគ្រោះដែលបានបាត់បង់ជីវិតក្នុងអគ្គីភ័យមានដូចជា៖
១. ឈ្មោះ យ៉ារី សុខសិលា ភេទ ប្រុស អាយុ ១៨ ឆ្នាំ (ស្លាប់នៅនឹងកន្លែងកើតហេតុ) ។
២. ឈ្មោះ ភក្ដី រីតា ភេទ ស្រី អាយុ ១៥ ឆ្នាំ (ស្លាប់នៅនឹងកន្លែងកើតហេតុ) ។
៣. ឈ្មោះ ភក្ដី សំមេន ភេទ ប្រុស អាយុ ១៣ ឆ្នាំ (ស្លាប់នៅនឹងកន្លែងកើតហេតុ) និង ម្ដាយឈ្មោះ បាត ស្រីមុំ អាយុ ៣៥ ឆ្នាំ (រងរបួសស្រាល)៕
