នៅថ្ងៃទី ០៧ ខែកញ្ញា ឆ្នាំ ២០២៥ អធិការដ្ឋាននគរបាលស្រុកបាកាន បានជូនដំណឹងពីលទ្ធផលនៃការបង្រ្កាបករណីឃាតកម្ម សម្លាប់មនុស្សយកទៅចោលក្នុងព្រៃសហគមន៍ នៅសល់តែគ្រោងឆ្អឹង បន្ទាប់ពីនៅថ្ងៃទី ០៦ ខែកញ្ញា ឆ្នាំ ២០២៥ វេលាម៉ោង ១៤ និង ៣០ នាទី ប៉ុស្តិ៍នគរបាលរដ្ឋបាលស្នាមព្រះ បានទទួលព័ត៌មានពីឈ្មោះរស់ សាវុធ អនុប្រធានភូមិអន្លង់មាន ថាមានប្រជាពលរដ្ឋដើរកាត់ទំពាំងឬស្សីព្រិច ឃើញមានមនុស្សដេកស្លាប់មានតែឆ្អឹងនៅក្នុងព្រៃសហគមន៍ ខាងក្រោយសាលាបណ្ដុះបណ្ដាលវិជ្ជាជីវៈរលាំង ស្ថិតក្នុងភូមិអន្លង់មាន ឃុំស្នាមព្រះ ស្រុកបាកាន ខេត្តពោធិ៍សាត់។
ក្រោយទទួលបានដំណឹងនេះ សមត្ថកិច្ច និង ក្រុមគ្រូពេទ្យ បានចុះទៅដល់កន្លែងកើតហេតុ ស្រាវជ្រាវពិនិត្យកន្លែងកើតហេតុ និង ពិនិត្យសាកសព (សពមានតែគ្រោងឆ្អឹង)។ ក្នុងនោះបើតាមការបំភ្លឺពីឈ្មោះណយ នាង ភេទប្រុស អាយុ ៤៧ ឆ្នាំ រស់នៅភូមិអណ្ដូងសំបួរ ឃុំស្នាមព្រះ ស្រុកបាកាន ខេត្តពោធិ៍សាត់ បានបញ្ជាក់ថាខ្លួនបានបាត់កូនស្រីបង្កើតឈ្មោះនាង ណាក ហៅចាន់ណា អាយុ ២៤ ឆ្នាំ ប្ដីឈ្មោះវិសាល ធ្វើការជាបុគ្គលិកនៅក្រុមហ៊ុនទីតាំង១០ហិចតា ឃុំថ្មដា ស្រុកវាលវែង ខេត្តពោធិ៍សាត់ ដោយបានបាត់ខ្លួនកាលថ្ងៃទី ១៧ ខែសីហា ឆ្នាំ ២០២៥ មុនពេលបាត់ខ្លួនកូនស្រីខ្លួនបានឈ្លោះប្រកែកគ្នាជាមួយប្ដី រឿងប្ដីប្រច័ណ្ឌ។
ក្នុងនោះ បើតាមការមើលក្នុងឃ្លីបវីដេអូរបង្ហោះតាមហ្វេសបុក កាលពីថ្ងៃទី ១៦ ខែសីហា ឆ្នាំ ២០២៥ នារីឈ្មោះនាង ណាក ហៅចាន់ណា ពាក់ស្បែកជើងស៊កពណ៌ស មានបូតុក្កតា ពណ៌រាងក្រហម ស្លៀកខោខៅប៊យជើងវែងពណ៌ក្រហម អាវក្រៅដៃវែង។ ចំណែកឯតាមការពិនិត្យកន្លែងកើតហេតុ និង ពិនិត្យសាកសពនៅកន្លែងកើតហេតុ សពមានតែគ្រោងឆ្អឹង សំលៀកបំពាក់ខោអាវ និង ស្បែកជើង មានភិនភាគដូចក្នុងឃ្លីបវីដេអូខាងលើ សពមានខ្សែសាកទូរសព្ទមានប្រវែង ១.៦០ ម៉ែត្រ រិតក និង ថង់ខ្មៅធំទំហំ៩០×១២០ គ្របពីលើសាកសព។
តាមការស្រាវជ្រាវជុំវិញរឿងហេតុខាងលើ សមត្ថកិច្ចបានកំណត់មុខសញ្ញាជនសង្ស័យឈ្មោះវិសាល ត្រូវជាប្ដីជនរងគ្រោះ ដោយនៅថ្ងៃទី ០៧ ខែកញ្ញា ឆ្នាំ ២០២៥ វេលាម៉ោង ០៨ និង ១៥ នាទីកម្លាំងបានចុះទៅនាំឈ្មោះសុខ វិសាល ភេទប្រុសអាយុ ២៤ ឆ្នាំ មុខរបរសន្តិសុខ យកមកកាន់អធិការដ្ឋាននគរបាលស្រុកបាកាន ដើម្បីសួរនាំ ឈ្មោះសុខ វិសាល បានសារភាពថា ខ្លួនពិតជាបានធ្វើសកម្មភាពយកខ្សែរឌុយសាកទូរស័ព្ទរឹតកប្រពន្ធខ្លួនឈ្មោះនាង ណាក ហៅចាន់ណា នៅព្រៃព្រិចស្ថិតក្នុងភូមិអន្លង់មាន ឃុំស្នាមព្រះ កាលថ្ងៃទី ១៧ ខែសីហា ឆ្នាំ ២០២៥ វេលាម៉ោង ១៣ និង ៣០ នាទី មូលហេតុប្រច័ណ្ឌប្រពន្ធ។ បច្ចុប្បន្ន ជនសង្ស័យឈ្មោះ សុខ វិសាល ត្រូវបានឃាត់ខ្លួនតាមបញ្ជា ឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ នៅអធិការដ្ឋាននគរបាលស្រុកបាកានដើម្បីបំពេញនិតិធីចាត់ការតាមផ្លូវច្បាប់៕
ប្រភព ៖ អធិការដ្ឋាននគរបាលស្រុកបាកាន
