នៅពោធិ៍សាត់ព្រឹកមិញ មានករណីក្រឡាប់រថភ្លើងដឹកប្រេង បណ្ដាលឱ្យធ្លាក់ទូប្រេងអស់ ៣ ដោយសារបញ្ហាផ្លូវស្រុត

នៅថ្ងៃទី ១៧ ខែវិច្ឆិកា ឆ្នាំ ២០២៥ នេះ តាមរយៈលោក ផន រឹម អ្នកនាំពាក្យក្រសួងសាធារណការ និង ដឹកជញ្ជូន បានជូនដំណឹងពីរបាយការណ៍បឋម ស្តីពីហេតុការណ៍រថភ្លើងដឹកប្រេងបានក្រឡាប់ នៅវេលាម៉ោងវេលាម៉ោង ៦៖៣០ នាទីព្រឹក ថ្ងៃទី ១៧ ខែវិច្ឋិកា ឆ្នាំ ២០២៥ នេះ ស្ថិតនៅចំណុច PK191+600 ខ្សែដែកទិសខាងជើង ក្នុងភូមិច្រេះ ឃុំអូរតាប៉ោង ស្រុកបាកាន ខេត្តពោធិ៍សាត់។

តាមប្រភពបានឱ្យដឹងថា រថភ្លើងដឹកប្រេងមាន ២៤ ទូរ និង ក្បាលរថភ្លើងលេខ ៦៥៣៥ ចេញដំណើរពីភ្នំពេញ ទៅស្ថានីយ៍បឹងព្រីង ខេត្តបាត់ដំបង បានធ្លាក់ទូប្រេងចំនួន ៣ ទូ មិនមានគ្រោះដល់មនុស្សនោះឡើយ ខណៈមូលហេតុបឋមនៃឧបទ្ទវហេតុនេះ គឺដោយសារបញ្ហាផ្លូវស្រុត។

ទាក់ទិនទៅនឹងករណីនេះ ចំពោះវិធានការណ៍បន្ទាន់ ក្រុមហ៊ុន រ៉ូយ៉ាល់ រ៉េលវេ បានបញ្ជូនអ្នកគ្រប់គ្រងសុវត្ថិភាពម្នាក់ និង ក្រុមជួសជុលផ្លូវដែក ទៅកន្លែងកើតហេតុ ដោយរថយន្តបូមប្រេងពីក្រុមហ៊ុនសូគីម៉ិចបានមកដល់កន្លែងដើម្បីប្រមូលប្រេងឥន្ធនៈដែលកំពប់ ហើយរថយន្តស្ទូចចំនួន ២ គ្រឿងត្រូវបានបញ្ជូនទៅកាន់កន្លែងកើតហេតុ ហើយមានចម្ងាយប្រមាណ ២០ គីឡូម៉ែត្រ៕