យើងម្នាក់ៗគិតថា នៅផ្ទះសល់លុយ ដោយឡែក ប្តីប្រពន្ធជនជាតិអង់គ្លេសមួយគូនេះវិញ ពួកគេសុខចិត្តនាំកូនដើរលេងក្រៅប្រទេស ដោយហេតុការចំណាយនៅផ្ទះអស់ច្រើនខ្លាំង ឬ ច្រើនជាងការដើរលេងជុំវិញពិភពលោកទៅទៀត។
តាមរយៈប្រពន្ធឈ្មោះ Hayley Trow អាយុ ៣៧ ឆ្នាំ នាងបានប្រាប់សារព័ត៌មាន Jam Press ថា ការដើរកម្សាន្ត ៣ នាក់របស់គ្រួសារនាង ដែលមានប្តីឈ្មោះ Lewis អាយុ ៤៥ ឆ្នាំ និង កូនស្រីអាយុ ៦ ឆ្នាំ ពួកគេចាយលុយអស់តិចជាងការរស់នៅផ្ទះនៅអង់គ្លេស ដែលបូកសរុបទាំងការចំណាយលើអាហារ ការស្នាក់នៅ ការដើរកម្សាន្តផ្សេងៗ។
ជាក់ស្តែង បើដើរលេងក្រៅប្រទេស ពួកគេចំណាយប្រហែលពី ២ ៥៣០ ដុល្លារទៅ ៣ ៧៩៥ ដុល្លារ ដែលអាចឆ្ពោះទៅកាន់កន្លែងក្នុងក្តីស្រមៃដូចជា៖ កោះបាលី, ទីក្រុងមីឡាន ប្រទេសអ៊ីតាលី និង សួនកម្សាន្ត Disneyland នៅទីក្រុងប៉ារីស ប្រទេសបារាំង។ ពួកគេបានបូកសរុបការចំណាយនៅផ្ទះ ដែលជាមធ្យមអស់ចាប់ពី ៥ ៤២២ ដុល្លារទៅ ៦ ៧៧៨ ដុល្លារ ក្នុងមួយខែ ខុសគ្នាសឹងពាក់កណ្តាលនឹងការដើរលេងទៅហើយ។ ក្នុងនោះ ការចំណាយមានដូចជា៖ ថ្លៃផ្ទះរស់នៅ ៤០៦ ដុល្លារក្នុងមួយខែ, ម្ហូប ២៧១ ដុល្លារក្នុងមួយសប្តាហ៍ និង ការចេញទៅក្រៅផ្ទះម្តងអស់ ១៣៥ ដុល្លារ។
បើប្រៀបធៀបនឹងឥលូវ ពួកគេកំពុងស្ថិតនៅកោះបាលី ចំណាយលើបន្ទប់ជួល ៦៧៥.៦៩ ដុល្លារក្នុងមួយខែ មានកន្លែងស្នាក់នៅប្រណីតភ្ជាប់ជាមួយអាងហែលទឹក ហើយមានទេសភាពស្រស់ស្អាត ធ្វើឱ្យពួកគេមានអារម្មណ៍ស្រស់ស្រាយរាល់ថ្ងៃ។ មុនពេលដើរលេងក្រៅប្រទេស ពួកគេតែងសម្រុកធ្វើការរយៈពេល ៧ ខែ រួចហើយរៀបគម្រោងសម្រាកលម្ហែរយៈពេលពេញមួយឆ្នាំតែម្តង។ ដើម្បីសន្សំកាន់តែច្រើន ពួកគេក៏បានទៅស្នាក់នៅផ្ទះគ្រួសារខាងប្តីផងដែរ។
មែនទែនទៅ ប្តីប្រពន្ធមានកូនស្រីមួយនេះ បានសម្រេចចិត្តរៀបគម្រោងដើរកម្សាន្តបែបនេះតាំងពីឆ្នាំ ២០២២ មក បន្ទាប់ពីពួកគេបានទៅកម្សាន្តនៅប្រទេសអូស្ត្រាលី។ ពួកគេធ្វើបែបនេះ ក្នុងបំណងបានលម្ហែផង ឱ្យកូនស្រីបានឃើញពិភពលោកផង ហើយក៏សន្សំសំចៃផងដែរ។ ចំពោះការសិក្សារបស់កូនស្រី ពួកគេឱ្យកូនរៀនតាមអនឡាញទៀងទាត់ ដើម្បីទទួលបានចំណេះដឹងដូចក្មេងទូទៅ៕
ប្រភព៖ NYP
