នៅថៃ! ម្តាយចិត្តអប្រិយ សម្រាលកូនរួចទុកចោលកន្លៀតជញ្ជាំង ទាល់តែកូនអស់ដ-ង្ហើ-ម រីឯខ្លួនឯងរត់ទៅលេងទឹកប៉ាតម្សៅថ្ងៃសង្រ្កាន្ត

នៅថ្ងៃទី ១៧ ខែមេសា ឆ្នាំ ២០២៥ នេះ សារព័ត៌មានថៃ AMARINTV បានរាយការណ៍ពីករណីដ៏គួរឱ្យហួសចិត្តមួយ ដែលម្តាយមួយរូប បានលួចសម្រាលកូនចោលនៅកន្លៀតជញ្ជាំង ហើយទុកកូនចោល រីឯខ្លួនឯងរត់ទៅលេងទឹកប៉ាតម្សៅនៅសង្រ្កាន រហូតទាល់តែកូនដាច់ខ្យល់ស្លាប់។

តាមព័ត៌មានបានឱ្យដឹងថា ករណីនេះបានកើតឡើងនៅម្តុំ Don Mueang ទីក្រុងបាងកក កាលពីថ្ងៃទី ១៤ ខែមេសា ឆ្នាំ ២០២៥ កន្លងទៅ ដោយស្រ្តីជាម្តាយមានវ័យ ២៧ ឆ្នាំ ហើយកូនដែលពពោះមានអាយុ ៨ ខែជាកូនទី ៣។ ព័ត៌មានបានឱ្យដឹងទៀតថា ស្រ្តីជាម្តាយចង់ទៅលេងសង្រ្កាននឹងគេ តែជាប់ពពោះ តែសុខៗក៏ស្រាប់តែឈឺពោះចង់សម្រាល ទើបរត់ទៅកន្លៀតជញ្ជាំងហើយសម្រាលកូនដោយខ្លួនឯង រួចក៏យកកូនទៅទុកចោលនៅក្បែរថូផ្កា​ ចំណែកខ្លួនឯងក៏រត់ទៅលេងទឹក ទាំងឈាមហូរមិនទាន់បាត់។

យ៉ាងណាមិញ ក្រោយមកមានអ្នកឃើញទារកដែលម្តាយទុកចោលនោះ រួចក៏បានហៅអ្នកសង្រ្គោះមកជួយ រីឯម្តាយក៏បានដើរមកមើលដូចគ្នា តែបានកុហកគេថាឈាមហូរដោយសារតែមករដូវ មិនព្រមទទួលស្គាល់ថាជាអ្នកបង្កើតកូនចោលឡើយ។ លុះមានអាជ្ញាធរសួរដេញដោលច្រើនពេក ក៏ដាច់ចិត្តសារភាព ទើបចុងក្រោយត្រូវគេបញ្ជូនទៅមន្ទីរពេទ្យ ចំណែកកូនវិញ ដែលជាទារកភេទស្រីក៏ត្រូវបានអាជ្ញាធរជួយសង្រ្គោះដែរ តែជាអកុសលគេបានបាត់បង់ជីវិតទៅហើយ៕

ប្រភព៖ AMARINTV