នៅថៃ ទារកម្នាក់ត្រូវម្តាយផ្តល់កំណើតកណ្តាលភាពជ្រួលច្របល់ពេលកំពុងរញ្ជួយដី ឯគ្រូពេទ្យប្រឹងជួយមិនរត់ចោលតួនាទី

ពិតជាហេតុការណ៍មួយដ៏គួរឱ្យរន្ធត់ណាស់ កាលពីថ្ងៃទី ២៨ ខែមីនា ឆ្នាំ ២០២៥ កន្លងទៅនេះ ទីក្រុងបាងកកត្រូវបានវាយប្រហារដោយគ្រោះរញ្ជួយដី បណ្តាលឱ្យមនុស្សកើតការជ្រួលច្របល់ភ័យខ្លាចស្ទើរតែពេញទីក្រុង។

ខណៈហេតុការណ៍កំពុងតែកើតឡើង មនុស្សជាច្រើនបានរត់ភៀសខ្លួនចេញពីកន្លែងស្នាក់នៅ និង អគារខ្ពស់ៗ ចំណែកឯអ្នកជំងឺជាច្រើនក៏បានត្រូវបានក្រុមគ្រូពេទ្យជម្លៀសចេញពីមន្ទីរពេទ្យដើម្បីរក្សាសុវត្ថិភាព។ យ៉ាងណាមិញ ស្ថិតក្នុងចំណោមភាពជ្រួលច្របល់នេះដែរ សារព័ត៌មាន BBC បានទម្លាយឱ្យឃើញពីទារកមួយរូបត្រូវបានម្តាយផ្តល់កំណើតឱ្យនៅក្នុងសួនមួយកន្លែងនៅក្នុងទីក្រុងបាងកក។

កំណើតរបស់ទារកខាងលើនេះ ត្រូវបានមហាជននៅតាមបណ្តាញសង្គមចូលរួមអបអរយ៉ាងខ្លាំង ហើយក៏បានសរសើរមិនដាច់ពីមាត់នូវការទទួលខុសត្រូវរបស់គ្រូពេទ្យ ដែលព្យាយាមជួយដល់អ្នកជំងឺមិនថាស្ថិតក្នុងកាលៈទេសៈបែបណា។ ដោយឡែក មានមហាជនជាច្រើនបានចូលទៅជួយដាក់ឈ្មោះឱ្យទារកខាងលើនេះ ដោយម្នាក់ៗព្យាយាមរកឈ្មោះឱ្យទាក់ទងនឹងការរញ្ជួយដី ដើម្បីជាការចងចាំសម្រាប់ទារកនេះទៅថ្ងៃមុខ៕

ប្រភព៖ BBC