ថ្មីៗនេះ មានករណីបុរសម្នាក់នៅថៃ បានទាញកាំភ្លើងបាញ់ក្រុមក្មេងស្ទាវធ្លាយដើមទ្រូងអស់ម្នាក់ ក្រោយពីខឹងរឿងមកចតម៉ូតូនិយាយគ្នាឡូឡានៅមុខអាផាតមិនរបស់ខ្លួន។
ករណីមួយនេះបានកើតឡើងនៅថ្ងៃទី ២៤ ខែមីនា ឆ្នាំ ២០២៥ កន្លងទៅ នាខេត្ត Nonthaburi ដោយតាមព័ត៌មានបានឱ្យដឹងថា ដំបូងឡើយមានក្រុមក្មេងស្ទាវមួយក្រុមមានគ្នា ៤ នាក់ បានទៅចតម៉ូតូចាំគ្នីគ្នានៅក្បែរអាផាតមិនមួយកន្លែង។ ក្រោយមក ស្រាប់តែមានបុរសម្នាក់ដែលជាកូនម្ចាស់អាផាតមិនចេញមកសួរនាំថាហេតុអ្វីបានជាឡូឡាម្ល៉េះ តែក៏ទៅជាការទាស់សម្តីប្រវាយប្រតប់គ្នាជាមួយក្រុមក្មេងស្ទាវ ទើបបុរសរូបនេះបានទាញកាំភ្លើងដែលដាក់តាមខ្លួន បាញ់ទៅលើក្រុមក្មេងស្ទាវ បណ្តាលឱ្យធ្លាយដើមទ្រូងចំនួន ១ នាក់តែម្តង។
យ៉ាងណាមិញ ជនរងគ្រោះមានវ័យ ១៧ ឆ្នាំ ត្រូវបានគេបញ្ជូនទៅសង្រ្គោះបន្ទាន់នៅឯមន្ទីរពេទ្យ រីឯបុរសជាជនបង្កមានវ័យ ៣០ ឆ្នាំត្រូប៉ូលិសឃាត់ខ្លួនយកទៅសួរនាំ ហើយចុងក្រោយក៏ត្រូវគេចោទប្រកាន់ចំនួន ៤ ករណី មានការព្យាយាមសម្លាប់អ្នកដទៃ ការគ្រប់គ្រងអាវុធដោយមិនមានការអនុញ្ញាត ការដាក់អាវុធតាមខ្លួនដោយមិនមានហេតុផល និងការប្រើប្រាស់អាវុធនៅទីសាធារណៈ ហើយនឹងត្រូវបានបញ្ជូនខ្លួនទៅកាត់ក្តីតាមផ្លួវច្បាប់៕
ប្រភព៖ AMARINTV
