ស្ត្រីជនជាតិអូស្ត្រាលីម្នាក់បានសន្សំតុក្កតា Minions ប្រមាណ ១០៣៥ មកពីគ្រប់ខូឡិកហ្សិន រហូតទទួលបានកំណត់ត្រាពិភពលោកហ្គីណេស (Guinness World Record)។
ស្រ្តីរូបនេះមានឈ្មោះថា Liesl Benecke នាងបានប្រមូលតុក្កតា Minions អស់រយៈពេល ១៥ ឆ្នាំ ពោលចាប់តាំងពីរឿង Despicable Me ចេញផ្សាយម្ល៉េះ។ មកទល់ពេលនេះ នាងនៅតែមិនអាចបញ្ឈប់ខ្លួនឯងបាន ដោយអ្នកជុំវិញខ្លួន និង មិត្តរួមការងារ បានដាក់រហ័សនាមឱ្យនាងថា the Minion lady ឬ ស្ត្រី Minion។
តាមការរៀបរាប់ប្រាប់ខាងកំណត់ត្រាពិភពលោកហ្គីណេស ខូឡិកហ្សិនតុក្កតា Minions ដែលនាងបានប្រមូល មកពីប្រទេសផ្សេងៗគ្នាដូចជា សិង្ហបុរី ជប៉ុន អ៊ីតាលី អាមេរិក ព័រទុយហ្គាល់ តៃវ៉ាន និង ចិន ដែលក្នុងនោះរួមបញ្ចូលសម្លៀកបំពាក់ តុក្កតា បន្តោងសោ movie posters និង សូម្បីតែសាក់ផងដែរ។
លើសពីសន្សំតុក្កតា នាងថែមទាំងធ្វើដំណើរទៅប្រទេសសិង្ហបុរី ដើម្បីអបអរថ្ងៃខួបកំណើតរបស់នាងជាមួយតុក្កតា Minions នៅ Universal Studios ទៀតផង។ នាងនិយាយថា តុក្កតា Minions គឺជាប្រភពនៃសុភមង្គលរបស់នាង ហើយភាពឆ្កួតៗរបស់វា តែងតែធ្វើឱ្យនាងសើចជានិច្ច។ ចំពោះគ្រួសារនាងវិញ ពួកគេគាំទ្រ និង ជួយនាងពេញទំហឹង ដើម្បីបង្កើតអាណាចក្រ Minions៕
