នៅតែខ្លាំង! អ្នកម៉ាក់រូបស្រស់ មៀលីយ៉ាន ទើបក្ដោបបានតំណែងមួយទៀតក្នុងវិស័យបវរកញ្ញា ត្រៀមតំណាងប្រទេសជាថ្មីក្នុងឆ្នាំ ២០២៥ នេះ

មហាជនអ្នកគាំទ្រវិស័យបវរកញ្ញាសុទ្ធតែបានជ្រាបហើយពីសមត្ថភាពដ៏លេចធ្លោរបស់អ្នកម៉ាក់កូន ២ អ្នកនាង មៀលីយ៉ាន ដែលកាលពីចុងឆ្នាំ ២០២៤ កន្លងទៅ អ្នកនាងបានប្រកួតជាប់ក្នុង Top 5 នៃកម្មវិធី Miss Universe Cambodia 2024 ព្រមទាំងមកដល់ដើមឆ្នាំ ២០២៥ អ្នកនាងក៏ទទួលបានឱកាសក្លាយជា Super Talent of the Cambodia 2025 និង តំណាងកម្ពុជាប្រកួតលើឆាកអន្តរជាតិទៀតផង។

ក្នុងដំណើរប្រកួតលើឆាកអន្តរជាតិ Super Talent of the World 2025 ដែលបានប្រព្រឹត្តនៅលើទឹកដីប្រទេសកូរ៉េខាងត្បូង កាលពីពាក់កណ្ដាលខែកុម្ភៈ ឆ្នាំ ២០២៥ កន្លងទៅនោះ អ្នកនាង មៀលីយ៉ាន ក៏បានធ្វើឱ្យមហាជនអ្នកគាំទ្រមានមោទកភាពខ្លាំង ដែលនាងអាចឈានជើងចូល Top 15 នាក់ចុងក្រោយ ព្រមទាំងទទួលបានពានរង្វាន់ដ៏ធំមួយប្រចាំ Miss Super talent of the World គឺតំណែងជា Rising Star 2025។

ក្រោយបញ្ចប់បេសកកម្មតំណាងប្រទេស និង ទទួលបានលទ្ធផលជាទីមោទកសម្រាប់កម្ពុជានេះដែរ អ្នកនាង មៀលីយ៉ាន ក៏បន្តបំពេញតួនាទីក្នុងតំណែងរបស់ខ្លួន ព្រមទាំងឆក់បានការចាប់អារម្មណ៍សរសើរលើអាជីពថ្មីរបស់អ្នកនាង គឺជាពិធីការិនីដ៏មានទេពកោសល្យ វោហារស័ព្ទជាភាសាអង់គ្លេសយ៉ាងស្ទាត់ជំនាញលើវេទិកាបវរកញ្ញាផ្សេងៗ។

ដោយឡែក មកដល់ថ្មីៗនេះ អ្វីដែលធ្វើឱ្យមហាជនចាប់អារម្មណ៍អបអរជាថ្មីចំពោះ អ្នកម៉ាក់រូបស្រស់ មៀលីយ៉ាន ក្រោយទទួលបានដំណឹងថា អ្នកនាងក្ដោបបានឱកាសក្លាយជាបវរកញ្ញាម្ចាស់មកុដថ្មីក្នុងកម្មវិធី Miss Asia Pacific International Cambodia 2025 ដែលនឹងត្រូវត្រៀមខ្លួនតំណាងកម្ពុជាប្រកួតលើឆាកអន្តរជាតិម្ដងទៀតក្នុងឆ្នាំ ២០២៥ នេះ៕