នៅតែកក់ក្ដៅ! ថ្ងៃពិសេសកូនស្រី ជំទាវ ចន ច័ន្ទលក្ខិណា និង លោក យុត្ថារា ឆានី បង្ហាញវត្តមានទាំងគូ មិនអាចអវត្តមានម្នាក់បាន

មហាជនធ្លាប់បានជ្រាបមកហើយពីទំនាក់ទំនងរវាងជំទាវ ចន ច័ន្ទលក្ខិណា និង អតីតស្វាមីលោក យុត្ថារា ឆានី ដ្បិតតែអ្នកទាំងពីរបានចែកផ្លូវគ្នាច្រើនឆ្នាំមែន តែអ្នកទាំងពីរក៏នៅតែបន្តរាប់អានគ្នាធម្មតា ហើយពេលនេះពួកគេក៏បានសាងជីវិតគ្រួសារថ្មីរៀងខ្លួនយ៉ាងមានសុភមង្គល។

លើសពីនេះ កន្លងមក ជំទាវ ចន ច័ន្ទលក្ខិណា និង លោក យុត្ថារា ឆានី ក៏នៅតែបំពេញតួនាទីជាប៉ាម៉ាក់ដ៏ល្អចំពោះកូនស្រីបណ្ដូលចិត្ត នី ហង្សាចូលី ដែលតែងបង្ហាញវត្តមានរួមគ្នាក្នុងថ្ងៃពិសេសៗរបស់កូនស្រី និង បង្ហាញក្ដីស្រឡាញ់ពេញដោយភាពកក់ក្ដៅចំពោះនាង។

ជាក់ស្ដែង ថ្មីៗនេះ ក៏បានឃើញហ្វេសប៊ុកលោក យុត្ថារា ឆានី បង្ហោះពីកូនស្រីបណ្ដូលចិត្តក្នុងថ្ងៃបញ្ចប់ការសិក្សាថ្នាក់ទី ១២ ដោយរូបលោក និង ជំទាវ ចន ច័ន្ទលក្ខិណា បានទៅចូលរួមអបអរសាទរក្នុងពិធីប្រគល់សញ្ញាបត្របញ្ចប់ការសិក្សានេះដោយផ្ទាល់ ក្នុងនាមជាប៉ាជាម៉ាក់ថតរូបភាពពេញដោយក្ដីស្រឡាញ់ និង មោទកភាពចំពោះកូនស្រីផងដែរ។

ក្នុងនោះ លោក យុត្ថារា ឆានី បានរៀបរាប់ភ្ជាប់ជារូបភាពថា ៖ «កូនស្រីបណ្តូលចិត្ត រាំរបាំជូនពរ អបអរសាទរពិធីទទួលសញ្ញាបត្របញ្ចប់ការសិក្សាថ្នាក់ទី ១២ ឪពុក ម្តាយ ម៉ាក់ធំ រួមទាំងក្រុមគ្រួសារ មានមោទកភាពចំពោះកូនណាស់ Jo Jo», «Congratulations and proud of you My lovely daughter Jolly Ny Hangza»៕