ពិតជារឿងគួរឱ្យហួសចិត្តអស់សំណើចខ្លាំងណាស់ ដែលមានក្មេងប្រុសជនជាតិចិនម្នាក់ បានខលប្តឹងប៉ូលិសថាមានចោរនៅក្នុងផ្ទះ ក្រោយខឹងនឹងឪពុកដែលយកអាំងប៉ាវរបស់គេទុក។
តាមព័ត៌មានបានឱ្យដឹងថា នៅថ្ងៃកើតហេតុខាងអាជ្ញាធរបានទទួលខ្សែទូរស័ព្ទមកពីក្មេងប្រុសម្នាក់ ដោយបានប្រាប់ថាមានចោរនៅក្នុងផ្ទះរបស់គេ។ ខាងអាជ្ញាធរក៏បានចុះទៅដល់ផ្ទះក្មេងប្រុសខាងលើ ហើយគេក៏បាននាំអាជ្ញាធរឱ្យទៅចាប់ចោរ ដែលតាមពិតគឺជាឪពុកដែលកំពុងអង្គុយនៅលើគ្រែសោះ។
ព័ត៌មានបានឱ្យដឹងទៀតថា តាមពិតទៅក្មេងប្រុសរូបនេះទើបតែបានអាំងប៉ាវពីញាតិមិត្ត តែក៏ត្រូវឪពុកបង្ខំដកទុក ដោយអាងនឹងរក្សាទុកឱ្យ។ ក្មេងប្រុសរូបនេះមិនពេញចិត្តឡើយ ហើយក៏ខឹងជាខ្លាំង រួចក៏បានយកទូរស័ព្ទរបស់ខ្លួនខលទៅប្តឹងប៉ូលិសតែម្តង។ យ៉ាងណាមិញ ប៉ូលិសក៏បានជួយនិយាយពន្យល់ប្រាប់ហេតុផលទៅកាន់ក្មេងប្រុសរូបនេះ ហើយក៏បានណែនាំឪពុកក្នុងការធ្វើយ៉ាងណាឱ្យកូនទុកចិត្តផងដែរ ដែលចុងក្រោយឪពុកកូនក៏បានត្រូវគ្នាវិញ៕
ប្រភព៖ Khaosod
