សារព័ត៌មានបរទេស បានរាយការណ៍ពីការកាត់ទោសទៅលើក្រុមគ្រួសារដ៏ធំមួយនៅប្រទេសចិន ដែលរកស៊ីជាមួយអំពើឧក្រិដ្ឋកម្មនៅឯប្រទេសមីយ៉ាន់ម៉ា ដោយត្រូវប្រហារជីវិតចំនួន ១១ នាក់ និងជាប់គុកជាង ៣០ នាក់។
តាមព័ត៌មានបានឱ្យដឹងថា នៅថ្ងៃទី ៣០ ខែកញ្ញា ឆ្នាំ ២០២៥ នេះ តុលាការក្រុង Wenzhou ក្នុងខេត្ត Zhejiang ប្រទេសចិន បានធ្វើការសម្រេចកាត់ទោសទៅលើក្រុមគ្រួសារត្រកូលមីងជាច្រើននាក់ ដែលជាប់ពាក់ព័ន្ធជាមួយនឹងឧក្រិដ្ឋកម្មឆ្លងដែននៅទីក្រុង Laukkai ប្រទេសមីយ៉ាន់ម៉ា ដែលជាប់ព្រំប្រទល់ជាមួយប្រទេសចិន។ ក្រុមគ្រួសារត្រកូលនេះ បានរកស៊ីជាមួយនឹងបទល្មើសធំៗតាំងពីឆ្នាំ ២០១៥ មានដូចជា ការបោកប្រាស់តាមអនឡាញ ការបើកបនល្បែងខុសច្បាប់ ការជួយដូរគ្រឿងញៀន និងការជួយដូរផ្លូវភេទ ដោយពួកគេទាញចំណូលបានរហូតដល់ទៅជាង ១ ម៉ឺនលានយ័នឯណោះ ហើយត្រូវប៉ូលិសបង្រ្កាបបានក្នុងឆ្នាំ ២០២៣។
យ៉ាងណាមិញ តុលាការបានសម្រេចកាត់ទោសប្រហារជីវិតមនុស្សក្នុងគ្រួសារនេះចំនួន ១១ នាក់ កាត់ទោសដោយជាប់ពន្ធនាគារអស់មួយជីវិត ១១ នាក់ និង ២៣ នាក់ទៀត បានកាត់ទោសឱ្យជាប់ពន្ធនាគារពីរយៈពេល ៥ ឆ្នាំទៅ ២៤ ឆ្នាំ និងកាត់ទោសប្រហារជីវិតចំនួន ៥ នាក់ទៀត តែអនុញ្ញាតឱ្យព្យួរទោសបានចំនួន ២ ឆ្នាំ៕
