សារព័ត៌ Khaosod របស់ថៃ បានរាយការណ៍ឱ្យដឹងពីស្ថានភាពទឹកជំនន់ក្នុងប្រទេសថៃ ដែលពេលនេះកំពុងតែវាយប្រហារដល់ខេត្តកាន់ចាណាក់បុរី បណ្តាលឱ្យលិចលង់ ដាច់ស្ពានដាច់ផ្លូវ ជាពិសេសគឺលិចទាំងមន្ទីរពេទ្យទៀត។
តាមព័ត៌មានបានឱ្យដឹងថា ទឹកជំនន់នេះបានបំបុកចេញពីព្រៃ ដោយសារតែភ្លៀងធ្លាក់ខ្លាំងកាលពីថ្ងៃទី ១៥ ខែកញ្ញា ឆ្នាំ ២០២៥ កន្លងទៅ ហើយបានហូរចូលមកវាយប្រហារស្រុកឡៅខ្វាន់ ខេត្តកាន់ចាណាក់បុរី បណ្តាលឱ្យមានផ្ទះប្រជាជនប្រមាណជា ៥០ ខ្នងបានរងផលប៉ះពាល់ ចំណែកផ្លូវ និងស្ពានមួយចំនួនត្រូវបានកាត់ផ្តាច់ ហើយសាលារៀនត្រូវបានផ្អាក លើសពីនេះមន្ទីរពេទ្យក៏ត្រូវទឹកហូរចូល ធ្វើឱ្យគ្រូពេទ្យជ្រួលច្របល់នាំគ្នាលើកឧបករណ៍ពេទ្យឱ្យផុតពីទឹក ព្រោះតែខ្លាចខូចខាត។
យ៉ាងណាមិញ អាជ្ញាធរប្រចាំតំបន់ ក៏ដូចជាអង្កការដែលពាក់ព័ន្ធបានសហការគ្នាចុះទៅជួយប្រជាជននៅក្នុងតំបន់ប៉ះពាល់ហើយ ដោយជួយសង្រ្គោះជាបឋម និងតាមដានស្ថានភាពទឹកជំនន់ផងដែរ៕
ប្រភព៖ Khaosod
