នៅក្មេងសោះមានទាំងសមត្ថភាព និង ឆន្ទៈ! ស្ត្រីវៀតណាមម្នាក់ សុខចិត្តលះបង់ក្តីស្រមៃជាអវកាសយានិក ទៅធ្វើរឿងដ៏គួរឱ្យស្ងើចសរសើរមួយ

កើតនៅក្នុងឆ្នាំ ​១៩៩១ នៅរដ្ឋ California នាង Amanda Nguyen មានឈាមជ័រជាវៀតណាម។ បច្ចុប្បន្ន នាងជាសកម្មជន និង ជាអវកាសយានិក។ ជាមោទកភាពសម្រាប់ប្រជាជនវៀតណាម ថ្មីៗនេះនាងបានបំពេញក្តីស្រមៃរបស់ខ្លួន ក៏ដូចជាក្លាយជាស្ត្រីវៀតណាមដំបូង ដែលហោះឡើងទៅទីអវកាសជាមួយយានរបស់ក្រុមហ៊ុន Blue Origin។

Amanda Nguyen បានទទួលសញ្ញាបត្រពីសាកលវិទ្យាល័យហាវ៉ាដ (Harvard University) និង បានធ្វើការនៅអង្គការណាសាក្នុងឆ្នាំ ២០១៣។ នាងបានធ្វើការស្រាវជ្រាវនៅមជ្ឈមណ្ឌល Harvard-Smithsonian សម្រាប់ Astrophysics, MIT, NASA និង វិទ្យាស្ថានអន្តរជាតិសម្រាប់វិទ្យាសាស្ត្រអវកាស (IIAS) ។

មុនបានហោះឡើងទៅអវកាស នាងបានបោះបង់ក្តីស្រមៃជាអវកាសយានិក ដើម្បីធ្វើជាសកម្មជនប្រឆាំងទាមទារសិទ្ធិជនរងគ្រោះ។ សកម្មភាពរបស់នាង ផ្តោតលើអន្តរកម្មនៃជាតិសាសន៍ និង យេនឌ័រ។ តាមរយៈអង្គការ Rise ដែលជាអង្គការមិនស្វែងរកប្រាក់ចំណេញ បង្កើតឡើងដោយនាងផ្ទាល់ នាងបានបញ្ឆេះចលនាបញ្ឈប់ការស្អប់អាស៊ី (Stop Asian Hate) និង ទាមទារសិទ្ធិពីការរងគ្រោះរំលោភបំពានផ្លូវភេទ នៅសហរដ្ឋអាមេរិក និង អង្គការសហប្រជាជាតិ។

ក្រោយការតស៊ូអស់រយៈពេលជាច្រើនឆ្នាំ អង្គការសហប្រជាជាតិបានអនុម័តវាជាឯកច្ឆន្ទ។ ហើយជាមួយភាពជោគជ័យទាំងនេះ នាងត្រូវបានគេតែងតាំងសម្រាប់រង្វាន់ណូបែលសន្តិភាពឆ្នាំ ២០១៩ (2019 Nobel Peace Prize)  និង Woman of the Year របស់ទស្សនាវដ្តីដ៏ល្បី Time Magazine នៅក្នុងឆ្នាំ ២០២២ ផងដែរ។

បំពេញបេសកកម្មរួចរាល់ នាងបានត្រលប់មកបំពេញក្តីស្រមៃជាអវកាសយានិកវិញ ដោយចូលហ្វឹកហាត់ខាងជីវៈអវកាសជាថ្មី។ ទីបំផុតក្តីស្រមៃក្លាយជាការពិត នាងបានអង្គុយក្នុងរ៉ុកកែត ហោះទៅទីអវកាសជាមួយអ្នកដំណើរនារី ៥ នាក់ទៀត ដោយចេញដំណើរកាលពីថ្ងៃទី ១៤ ខែ មេសា ឆ្នាំ ២០២៥ នៅវេលាម៉ោង ៩ និង ៣០ នាទីព្រឹក។ ការហោះទៅអវកាសនេះ នាងមិនត្រឹមតែជាស្ត្រីវៀតណាមដំបូងប៉ុណ្ណោះទេ តែថែមទាំងជាស្ត្រីដំបូងនៅអាស៊ីអាគេ្នយ៍ ដែលហោះទៅកាន់អវកាសផងដែរ៕