ជារឿងដ៏គួរឱ្យភ្ញាក់ផ្អើល និង នឹកស្មានមិនដល់ នៅវេលាម៉ោងប្រមាណ ៣ និង ១៥ នាទី ថ្ងៃទី ២១ ខែសីហា ឆ្នាំ ២០២៥ មានករណីជនសង្ស័យម្នាក់ ជិះម៉ូតូ ១ គ្រឿងទៅឈប់ជិតអាជីវករ ២ នាក់ប្ដីប្រពន្ធ ដែលកំពុងស្ទូចត្រីលេង រួចឆក់ខ្សែកពីបុរសជាប្តីបានសម្រេច ជិះម៉ូតូគេចខ្លួនទៅបាត់ស្រមោល ដែលហេតុការណ៍នេះបានកើតឡើងនៅចំណុចស្រះទឹកមួយកន្លែង នៅភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ។
ទាក់ទិនទៅនឹងករណីនេះ តាមប្រភពព័ត៌មានបានបញ្ជាក់ឱ្យបានដឹងថា ជនរងគ្រោះជាប្ដី មានឈ្មោះម៉ៅ ធាន អាយុ ៤៥ ឆ្នាំ មុខរបរលក់ដូរ មានទីលំនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ បានបាត់បង់ខ្សែកប្លាទីន ១ ខ្សែ តម្លៃ ១៥០០ ដុល្លារ ខណៈរឿងរ៉ាវនៅមុនពេលកើតហេតុ គឺមានប្ដីប្រពន្ធ ២ នាក់ ឆ្លៀតពេលទំនេរពីការលក់ដូរ បាននាំកូន ២ នាក់ជិះរថយន្តម៉ាកឡង់គ្រីស័រ ពាក់ស្លាកលេខកម្ពុជា PICH-007 ទៅស្ទូចត្រីនៅចំណុចកើតហេតុខាងលើ។ លុះពេលកំពុងស្ទូចត្រី ស្រាប់តែមានជនសង្ស័យម្នាក់ជិះម៉ូតូម៉ាកហុងដា ស្កូបពីស៊េរីឆ្នាំ ២០២៥ ពណ៍ ស មួយគ្រឿងទៅឈប់ចម្ងាយប្រហែល ១០ ម៉ែត្រ ពីពួកគាត់ ហើយមិនបានពន្លត់ម៉ាស៊ីនម៉ូតូនោះទេ។
ជនរងគ្រោះបាននិយាយបន្តទៀតថា ពេលនោះជនសង្ស័យបានសួរលោកថា «ស្ទូចត្រីបានអត់?» ហើយខណៈដែលលោកជាប់និយាយទូរស័ព្ទ ស្រាប់តែជនសង្ស័យឆក់យកខ្សែកប្តីបានសម្រេច រួចរត់ឡើងជិះម៉ូតូទៅតាមផ្លូវជាតិលេខ ៣ បាត់ ហើយអ្នកទាំងពីរក៏បានបើករថយន្តដេញតាមរហូតដល់មុខបុរីពិភពថ្មី លុះអត់ទាន់ក៏ត្រលប់ក្រោយវិញ ក្នុងបំណងទៅផ្ទះ ស្រាប់តែដល់មុខព្រលានយន្តហោះអន្តរជាតិភ្នំពេញ ក៏បត់ត្រលប់ក្រោយទៅកន្លែងកើតហេតុវិញ ឃើញជនសង្ស័យកំពុងរាវទឹកក្នុងជង្ហុកនៅតាមបណ្តោយផ្លូវ។
ជនរងគ្រោះដដែលបានឱ្យដឹងបន្តទៀតថា ពេលនោះលោកមិនបានដឹងថា ជនសង្ស័យរូបនោះកំពុងរាវរកអ្វីនោះទេ ប៉ុន្តែសង្ស័យរាវរកខ្សែក ដែលឆក់បានពីបុរសជាប្តីហើយជ្រុះនៅទីនោះ ស្របពេលដែលគ្រាន់តែឃើញរថយន្តទៅដល់ ជនសង្ស័យបានរត់ឡើងម៉ូតូ ហើយលោកក៏បត់រថយន្តប្រុងបុក ប៉ុន្តែបុកមិនទាន់ ជនសង្ស័យក៏ជិះម៉ូតូគេចខ្លួនបាត់ស្រមោល។ ក្រោយកើតហេតុ នគរបាលប៉ុស្តិ៍កន្ទោក បានចុះទៅកាន់ទីនោះ រួចនាំជនរងគ្រោះទៅដាក់ពាក្យបណ្ដឹង ដើម្បីស្រាវជ្រាវចាប់ខ្លួនជនសង្ស័យខាងលើ៕
ប្រភព ៖ Town News
