ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ នឹងឈានចូលមកដល់នៅវេលាទៀបភ្លឺ ថ្ងៃច័ន្ទ ២ រោច ខែចេត្រ ត្រូវនឹងថ្ងៃទី ១៤ ខែមេសា គ្រឹស្តសករាជ ២០២៥ វេលាម៉ោង ០៤ និង ៤៨ នាទីទៀបភ្លឺ។
ទេវធីតា ដែលនឹងយាងមកគ្រប់គ្រងជម្ពូរទ្វីបមនុស្សលោកឆ្នាំថ្មីនេះ ជាមគ្គនាយិកាព្រះនាម គោរាគៈទេវី ជារាជបុត្រីទី ២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយសៀតផ្កាអង្គារបុស្ប អភរណៈ កែវមុក្តា ភក្សាហារទ្រង់តេលំ (ប្រេង) ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រលើខ្នងសេ្តចព្យាគ្ឃៈ (ខ្លា) ជាយានពាហនៈ។
អ្វីដែលគួរឱ្យចាប់អារម្មណ៍នោះ ក្នុងឆ្នាំថ្មីនេះ ផ្កាដែលទេវធីតាឆ្នាំថ្មី ព្រះនាម គោរាគៈទេវី ទ្រង់សៀតនៅព្រះកាណ៌ (ត្រចៀក) យាងចុះមកគ្រប់គ្រងជម្ពូរទ្វីបនោះ គឺជាផ្កា «អង្គារបុស្ប» ដែលផ្កាប្រភេទនេះគេឧស្សាហ៍បានឃើញដុះនៅក្បែៗផ្ទះ និង ទីប្រជុំជន ដែលផ្កានេះ មានសណ្ឋានដូចក្នុងរូបភាពខាងក្រោម ៖
